Կենտրոն եւ Նորք-Մարաշ ընդհանուր իրավասության դատարանում այսօր կրկին հետաձգվեց «լրագրողն ընդդեմ ոստիկանապետի» գործով քննությունը: www.1in.am կայքի լրագրող Սիրանույշ Պապյանը, հիշեցնենք, դիմել է ընդդեմ ՀՀ ոստիկանապետ Վլադիմիր Գասպարյանի`պատիվը եւ արժանապատվությունը վիրավորելու հայցով:
Հիշեցնենք, ապրիլի 24-ին, Ծիծեռնակաբերդում, լրագրողի դիտարկմանը, որ ոստիկանության բարեփոխումները տեսանելի չեն, Վլադիմիր Գասպարյանը պատասխանել էր. «Ես էլ ձեր մեջ կին չեմ տեսնում»:
Նախնական դատական նիստը մեկ անգամ արդեն հետաձգվել էր` հայցի լրացման համար: Այսօր նիստը հետաձգվեց պատասխանողի միջնորդությամբ: Պատասխանողի ներկայացուցիչ Տիգրան Աթանեսյանը օգոստոսի 31-ին միջնորդություն էր ներկայացրել դատարանին`նշելով, որ ամսի 29-ին ստացել է լրացումները: Պատասխանողի ներկայացուցիչը նկատել էր, որ հայցվորն, ըստ էության փոխել է հայցի առարկան, քանի որ երկու կետով հայցապահանջի ավելացում կա:
Դատարանը բավարարեց միջնորդությունը: Հաջորդ նիստը կկայանա հոկտեմբերի 5-ին, ժամը 14. 30-ին:
Կարդացեք նաև
Սիրանույշ Պապյանի ներկայացուցիչ Դավիթ Ասատրյանը լրագրողների հետ զրույցում մանրամասնեց, որ նախկին հայցադիմումով իր հայցորդը պահանջում էր, որպեսզի ոստիկանապետը հրապարակային ներողություն խնդրի: Այժմ իրենք պահանջում են, որպեսզի դատարանը ճանաչի եւ հաստատի նաեւ հայցվորի մասնագիտական գործունեությանը խոչընդոտելու փաստը: Երրորդ պահանջը հետեւյալն է. «Խնդրում ենք դատարանը ճանաչի եւ հաստատի այն փաստը, որ իմ վստահորդը ենթարկվել է գենդերային խտրականության եւ սեռի հատկանիշներով նրա նկատմամբ իրավունքները սահմանափակվել են»:
Փաստաբանի համոզմամբ, իրենց պահանջները հիմնավոր են եւ դատարանի կողմից պետք է բավարարվեն, մանավանդ, որ ներկայացված տեսանյութում բոլոր հիմնավորումներն առկա են:
Սիրանույշ Պապյանի մյուս պաշտպան Միհրան Աղաբաբյանն էլ Aravot.am-ի հետ զրույցում մանրամասնեց, որ իբրեւ հիմք իրենք ներկայացրել են նույն տեսանյութը`ավելի մանրամասնորեն վերլուծված:
Aravot.am-ի հարցին ի պատասխան, Դավիթ Ասատրյանն ասաց, որ իր վստահորդը բարոյական վնասի նյութական փոխհատուցման պահանջ չունի պատասխանողից:
Նելլի ԳՐԻԳՈՐՅԱՆ
