ԱՄՆ Պետքարտուղարությունը հայտնել է, որ ընդլայնել է Ռուսաստանի նկատմամբ պատժամիջոցների ցանկը՝ Ուկրաինայի գործերին միջամտելու պատճառով:
Պատժամիջոցների ցուցակում հայտնվել են ռուսական «Մոստոտրեստ» և «ՍՄԳ-Մոստ» շինարարական ընկերությունները, որոնք ներկայումս մասնակցում են Կերչի նեղուցով դեպի Ռուսաստանի կողմից բռնակցված Ղրիմ կամուրջի շինարարությանը, ինչպես նաև «Գազպրոմի» մի շարք դուստր ընկերություններ:
Պատժամիջոցների տակ են հայտնվել նաև «Գազպրոմբանկի» հետ կապված «Միավորված մեքենաշինական գործարաններ» ԲԲԸ-ն, որը պատժամիջոցային ցուցակում ներառվել էր դեռ 2014թ.:
«ԱՄՆ ֆինանսների նախարարությունը մեր գործընկերների հետ դատապարտում է Ռուսաստանի կողմից միջազգային օրենսդրական նորմերի խախտումը, և մենք շարունակում ենք պատժամիջոցների ռեժիմն այն գործերի նկատմամբ, որոնք սպառնում են Ուկրաինայի խաղաղությանը, անվտանգությանը և ինքինիշխանությանը»,- հայտարարել է Ֆինանսների նախարարության արտասահմանյան ակտիվների հարցերով վարչության գործադրիր տնօրենի պաշտոնակատար Ջոն Սմիթը:
Կարդացեք նաև
Պատժամիջոցների նոր փաթեթում տեղ են գտել նաև ինքնահռչակ «Դոնեցկի ժողովրդական հանրապետության» և «Լուգանսկի ժողովրդական հանրապետության» 6 ներկայացուցիչներ և Ղրիմից 11 պաշտոնյաներ, այդ թվում՝ նախարարներ:
Ռուսաստանի արտգործնախարարությունը և «Գազպրոմը» առայժմ չեն մեկնաբանել Վաշինգտոնի այս որոշումը, սակայն նախկինում ռուս պաշտոնյաները հայտարարել էին, որ պատժամիջոցները բացասաբար են անդրադառնում Ուկրաինայի հակամարտության խաղաղ կարգավորման վրա:
Պետքարտուղարության պաշտոնական ներկայացուցիչի Ջոն Քիրբին հինգշաբթի տեղի ունեցած ճեպազրույցում ևս մեկ անգամ հաստատել է Ռուսաստանի դեմ պատժամիջոցներն ընդլայնելու տեղեկատվությունը: Նա նշել է, որ ԱՄՆ-ը «հետագայում էլ կշարունակի պատժամիջոցներ կիրառել՝ ստիպելու Ռուսաստանին հետևել Մինսկի պայմանավորվածություններին և դադարեցնել Ղրիմի շրջափակումը»:
Քիրբին նաև հայտնել է, որ ԱՄՆ պետքարտուղար Ջոն Քերիի և Ռուսաստանի արտգործնախարար Սերգեյ Լավրովի միջև հեռախոսազրույց է տեղի ունեցել, որի ընթացքում քննարկվել է Սիրիայում և Ուկրաինայում տիրող իրավիճակը:
Պատրաստեց՝ Վիկտորյա ԱՆԴՐԵԱՍՅԱՆԸ
