Ծաղկաձորի օլիմպիական բազայում այսօր ավարտվեց ՀՀ նախագահ մրցանակի համար «Հաշմանդամություն ունեցող լավագույն մարզիկ» մրցույթը, որին մասնակցեցին հանրապետության մարզերի եւ Երեւան քաղաքի թիմերը, ընդհանուր առմամբ՝ 165 մարզիկ:
Փակման արարողությանը ներկա էին սպորտի եւ երիտասարդության հարցերի նախարար Գաբրիել Ղազարյանը, Աշխատանքի եւ սոցիալական հարցերի նախարար Արտեմ Սարգսյանը, Կոտայքի մարզպետ Կարապետ Գուլոյանը, Ծաղկաձորի քաղաքապետ Արթուր Հարությունյանը:
Պարոնայք Գաբրիել Ղազարյանը եւ Արտեմ Սարգսյանը ողջունեցին բոլոր մասնակիցներին՝ նշելով սոցիալական այս խավը մեր հասարակության լիիրավ հատվածն է եւ որ նրանց բոլոր խնդիրները, այդ թվում նաեւ՝ առողջ ապրելակերպի, գտնվում են ՀՀ նախագահի եւ կառավարության մշտական ուշադրության ոլորտում:
Կարդացեք նաև
Մասնակիցները մրցել են շախմատ, սեղանի թենիս, բազկամարտ, շաշկի, դարթս, եռամարտ եւ բասկետբոլ մարզաձեւերում: Անհատական մարզաձեւերի հաղթողներն ու մրցանակակիրները պարգեւատրվեցին ՀՀ նախագահի դրամական խրախուսանքներով: Դրամական պարգեւներ ստացան նաեւ բասկետբոլում մրցանակային տեղ զբաղեցրած թիմերի բոլոր անդամները:
Թիմային հաշվարկով հաղթող եռյակը կազմեցին Երեւան քաղաքը, Սյունիքի եւ Լոռու մարզերը, որոնց հանձնվեցին նախագահի հատուկ գավաթներ:
Արարողության ավարտին նախարարներ Գաբրիել Ղազարյանն ու Արտեմ Սարգսյանը հաշմանդամություն ունեցող 12 մարզիկների նվիրեցին մարզումային անվասայլակներ:
Աշոտ ՀԱԿՈԲՅԱՆ
