«ԵԱՏՄ-ն լավ հիմք է Հայաստանի համար իրականացնելու այն բոլոր նպատակներն ու ծրագրերը, որ ունի իր առջև դրված Կառավարությունը երկրի տնտեսությունը զարգացնելու համար: Միայն համատեղ գործելով, ԵԱՏՄ շրջանակներում և ՌԴ հետ դաշինքում, հնարավոր է վերականգնել Հայաստանի արդյունաբերական ճյուղերի և գիտության ոլորտների առաջնային դիրքերը»,-լրագրողների հետ հանդիպման ժամանակ նման կարծիք հայտնեց Եվրասիական փորձագիտական ակումբի անդամ Աշոտ Թևիկյանը:
«Հաշվի առնելով Հայաստանի անցյալի առանձին արդյունաբերական ճյուղերի և գիտության ուղղությունների ձեռքբերումները, ինչպես նաև ճիշտ ձևավորելով և արդյունավետ իրականացնելով արդյունաբեր-նորարարական, գիտա-տեխնոլոգիական և ռազմաարդյունաբերական քաղաքականությունը, կիրառելով ռազմավարական կառավարման և պլանավորման համակարգը, հնարավոր է վերականգնել այդ ոլորտները և ուղղությունները: Դրա համար անհրաժեշտ է ձևավորել գիտահետազոտական և փորձակոնստրուկտորական մշակումների շղթա ԵԱՏՄ երկրների, հիմնականում Ռուսաստանի հետ:
Գործելով այս ձևաչափով, հնարավորություն կա իրականացնել արտահանման ուղղվածությամբ արդյունաբերական քաղաքականություն՝ արտադրական նորարարական բաղադրիչներով, որն, իր հերթին, հիմնված կլինի, մասնավորապես, հայաստանյան գիտական և տեխնոլոգիական ձեռքբերումների վրա»,- ասաց տնտեսագետը:
Վերլուծելով Հայաստանի տնտեսության ներկայիս վիճակը, անդրադառնալով ՀՀ Ազգային վիճակագրական ծառայության կողմից հրապարակված վերջին տվյալներին, համաձայն որոնց՝ 2016 թվականի առաջին կիսամյակում տնտեսական ակտիվության ցուցանիշն աճել է 4,7 տոկոսով՝ 16,7 տոկոսով արտահանման աճի ֆոնի վրա, տնտեսագետը նկատեց, որ 2015 և 2014 թվականների նույն ժամանակահատվածում այն աճել էր համապատասխանաբար 4,2 և 4,4 տոկոսով: Մասնագետի դիտարկումներով, տնտեսական ակտիվության ցուցանիշը կիսամյակի կտրվածքով աճել է հիմնականում ի հաշիվ արդյունաբերական ոլորտի՝ 8,9 տոկոս, ծառայության հատվածի՝ 8,3 տոկոս և գյուղատնտեսության՝ 3,3 տոկոս. «Ընթացիկ տարվա առաջին վեց ամիսների արդյունքով որոշ ոլորտներում կան դրական միտումներ, ինչը պայմանավորված է ոչ միայն ընկերությունների ակտիվ տնտեսական գործունեությամբ, այլ նաև պետության կողմից ձեռնարկություններին ցուցաբերած աջակցությամբ»:
Կարդացեք նաև
Նելլի ԳՐԻԳՈՐՅԱՆ
