Ազգային ինքնորոշման միավորումը կոչ է անում նախագահին համաներում կիրառել եւ ազատել Հայաստանում առկա բոլոր քաղբանտարկյալներին: ԱԻՄ առաջնորդ Պարույր Հայրիկյանը օգոստոսի 31-ին «Տեսակետ» մամուլի ակումբում մանրամասնեց, որ այդ հայտարարությամբ նկատի ունեն բոլոր նրանց, ում մեղադրանքում կա քաղաքական հետապնդման նույնիսկ կասկածի տարր:
«Սա իսկապես հարմար առիթ է՝ Հայաստանի մթնոլորտը փոխելու համար, շատ լավ հասկանալով, որ Հայաստանի իշխանությունները առ այսօր որեւէ բան չեն արել, որ մեզ կտրամադրեր իրենց նկատմամբ հավատով տրամադրվել: Բայց մինչեւ վերջ պետք է մենք մեզնից կախվածն անենք»,- ասաց նա:
Պարույր Հայրիկյանին խնդրեցինք մանրամասնել, թե կոնկրետ ում նկատի ունի՝ ասելով քաղբանտարկյալ, նա պատասխանեց. «Սասնա ծռեր», Շանթի խումբը, իհարկե՛, մեզ համար շատ կարեւոր է նաեւ Կարո Եղնուկյանը, Կարոյին, միեւնույն է, բաց են թողնելու: Կարո Եղնուկյանի գործը բացառիկ անհեթեթ գործ է, նա իսկապես խղճի կալանավոր է: Եվ, իհարկե՛, բոլոր կալանավորների վրա էլ կարող է այդ համաներումն անդրադառնալ, բայց շատ կուզեինք, որ անկախության 25-րդ տարեդարձի հետ կապված քաղկալանավոր հասկացությունը արմատապես վերացվեր, ինչը շատ շահեկան կլինի նաեւ իշխանությունների համար»:
Ամի ՉԻՉԱԿՅԱՆ
