Ընտրական օրենսգրքի վերահսկողական մեխանիզմները պետք է տեղադրվեին մինչեւ սեպտեմբերի 1-ը: Սակայն Կենտրոնական ընտրական հանձնաժողովը արձանագրել է, որ օրենքի կանոնակարգավորումները չեն մտնելու ուժի մեջ՝ նույնականացման քարտերի արտադրության ծրագրի իրականացման խոչընդոտների պատճառով:
Քաղաքագետ Ալեքսանդր Իսկանդարյանը «Տեսակետ» մամուլի ակումբում լրագրողների հետ զրույցի ընթացքում անդրադառնալով Ընտրական օրենսգրքի շուրջ կատարվող գործընթացներին՝ ասաց, որ զրուցել է մի շարք քաղաքական գործիչների հետ, որոնք դեմ են եղել սահմանադրական փոփոխություններին եւ Ընտրական օրենսգրքի նախագծին:
Ալեքսանդր Իսկանդարյանի պնդմամբ՝ նրանց մեծամասնությունը չի էլ կարդացել վերոնշյալ փաստաթղթերը: Նա համարում է, որ խնդիրը ոչ թե փաստաթղթի մեջ է, այլ վստահության բացակայության եւ արմատականության մեջ է: Ըստ նրա, իրավիճակը շարունակվելու է, մինչեւ ինչ-որ բան չկատարվի, երբ համագործակցության մշակույթը ձեւավորվի: Սակայն ներկայումս նման որեւէ գործընթաց չի ընթանում:
Ըստ նրա՝ «Ընտրությունների ընթացքում Հայաստանի խնդիրը ոչ թե այն է, թե ինչպես են կազմակերպված ընտրությունները, թե ինչ է գրված թղթի վրա եւ խնդիրը նաեւ վերահսկողական մեխանիզմները չեն: Խնդիրը ընտրությունների ընկալման մեջ է»,- ասաց քաղաքագետը:
Կարդացեք նաև
Ալեքսանդր Իսկանդարյանը նշեց, որ համաձայնության գալու հնարավորություն չկա, քանի որ ով համաձայնության է գալիս, կորցնում է իր վարկանիշը:
Ամի ՉԻՉԱԿՅԱՆ
