Ազգային ինքնորոշման միավորումը հանդիպում է ունենալու Լեռնային Ղարաբաղի նախագահ Բակո Սահակյանի հետ: ԱԻՄ առաջնորդ Պարույր Հայրիկյանը օգոստոսի 31-ին «Տեսակետ» մամուլի ակումբում ներկայացրեց մանրամասները:
«Ես խոսել եմ նախագահ Բակո Սահակյանի հետ, մենք իրար հետ վաղուց ենք քննարկել Արցախը աշխարհի ամենաժողովրդավարական երկիրը դարձնելու հարցը, երբ բացարձակ ժողովրդավարության բանաձեւը շրջանառության մեջ էր մտնում եւ դրա հիման վրա կարելի էր հաշվարկել, թե որ համակարգն է ավելի ժողովրդավարական: Այսինքն՝ մինչ այսօր, եթե տարբեր մեկնաբանություններ են արվում, նկատի ունեմ մինչ բացարձակ ժողովրդավարության բանաձեւի հայտնագործումը, ապա դրանից հետո ամեն ինչ հստակ դառնա»,- ասաց նա:
Անդրադառնալով Արցախում սահմանադրական փոփոխություններին՝ Պարույր Հայրիկյանն ասաց. «Ի զարմանս ինձ, Արցախը Հայաստանից տարբեր համակարգի ուղղությամբ է ընթանում, եւ դա այն համակարգն է, որն առավելապես մոտ է բացարձակ ժողովրդավարության գաղափարին: Ընդհանուր առմամբ, հանրամատչելի լեզվով կոչվում է նախագահական, մենք՝ ԱԻՄ-ականներս ասում ենք վարչապետական, որովհետեւ ժողովուրդն ունենում է ընտրված վարչապետ, նախագահ՝ նույն մարդն է եւ ոչ պակաս ուժեղ խորհրդարան: Ես կարծում եմ, հավատում եմ, հույս ունեմ, որ մեր այս այցելությունը մի շատ կարեւոր խնդրի կնպաստի, ավելի կարեւոր բանի, քան նույնիսկ Արցախի ինքնորոշման գաղափարի մատուցումն էր մեր կողմից:
Ես բառացի ասել եմ Արցախի պաշտոնյաներին, որ սա շատ ավելի լուրջ ներդրում կլինի արցախյան հարցում քան աշխարհի ամենահզոր զենքերի տրամադրումը Արցախին: Նույնիսկ Արցախը, եթե ատոմային զենք ստանա, այդքան մեծ չի լինի դրա նշանակությունը, որքան ժողովրդավարությունը՝ որպես բացարձակ արժեք, ընդունող աշխարհի համար Արցախի ամենաժողովրդավարական երկիր դառնալը: Եթե ես կարողանամ մեր Արցախի գործընկերներին բացատրեմ, ես նույնիսկ Բակո Սահակյանի հետ խոսելիս ասել եմ՝ եթե Դուք անկաշկանդ եք, այդ դեպքում իմաստ ունեն մեր խոսակցությունները, եթե Դուք ինչ-որ բանով կաշկանդված եք, ապա անիմաստ եմ համարում: Ես հավատում եմ, հուսով եմ, որ այս խնդրի կարեւորությունը կհասկանան, եւ ընդամենը մեկ տարի անց ամբողջ աշխարհի քարտեզների վրա Արցախը կմատնանշեն որպես աշխարհի միակ բացարձակ ժողովրդավարական երկիրը:
Կարդացեք նաև
Մնում է, որ լսեն ժամանակին Սովետական Միության ժողովրդավարական շարժումների հիմնադիր ճանաչված մարդու, ոչ իր համար շահեկան, բայց ընդհանրապես մարդկության համար շահեկան բացարձակ ժողովրդավարության մոդելը կիրառելու կոչը եւ այս հնարավորությունը օգտագործվի»:
Ամի ՉԻՉԱԿՅԱՆ
