Հարցազրույց ՀՀԿ խորհրդարանական խմբակցության անդամ ՍՈՒՔԻԱՍ ԱՎԵՏԻՍՅԱՆԻ հետ
-Երկու տասնամյակ շարունակ հայրենի ընդդիմությունը չի մասնակցել համայնքային ընտրություններին, ու նրանց պահվածքը ինչ-որ տեղ հեշտացրել է իշխանության գործը: Մինչդեռ այսօր ընդդիմության գործելաոճի փոփոխություն կա, դրա մասին է փաստում այն, որ մասնավորաբար Գյումրիում 10 ընդդիմադիր կուսակցություններ պատրաստվում են մասնակցել ՏԻՄ ընտրություններին. թեժ ընտրապայքար է սպասվում: Սա չի՞ մտահոգում ՀՀԿ-ին:
-Գյումրիում սպասվում է լուրջ մրցակցություն 10 կուսակցությունների ու մեկ դաշինքի միջեւ: Երբ մենք փոխում էինք Ընտրական օրենսգիրքը, շատ լավ հասկանում էինք, որ ինչպես Երեւանում, այնպես էլ Գյումրիում ու Վանաձորում անցկացվելիք ՏԻՄ ընտրություններում, մրցապայքար է ծավալվելու քաղաքական ուժերի միջեւ:
Ինձ համար եւս անսպասելի չէր, որ 10 կուսակցություններ Գյումրիում պետք է մասնակցության հայտ ներկայացնեին, քանի որ մշտապես 4 քաղաքական ուժեր են մասնակցել Գյումրիի քաղաքապետի ընտրություններին: Իսկ այսօր, երբ առջեւում 2017-ի խորհրդարանական ընտրություններն են, բնականաբար սպասվում էր, որ նաեւ նորաստեղծ քաղաքական ուժերն են ակտիվորեն մասնակցելու:
Երկու քաղաքների ՏԻՄ ընտրությունները, մասնավորաբար նորաստեղծ կուսակցությունների համար, լավագույն առիթ են հասարակությանը որպես քաղաքական ուժ ներկայանալու, թեկուզ իրենց անունն ընտրողին հայտնի դարձնելու համար: Այնպես որ տասը կուսակցությունների ակտիվությունը սպասելի էր:
Կարդացեք նաև
Ինչ վերաբերում է ՀՀԿ-ին, որը կմասնակցի դաշինքով, ապա պատրաստ ենք այդ մրցակցությանը: ՀՀԿ-ն մտահոգվելու խնդիր չունի, մեզ համար կարեւորն այն է, որ այդ ընտրապայքարը ծավալվի պատշաճ ձեւով: Ես նաեւ համոզված եմ, որ ՀՀԿ-ն այս պայքարում կունենա առավելություն:
-Որտեղի՞ց այդ համոզմունքը, կարծում եք՝ ձեր թեկնածո՞ւն է ավելի մրցունակ։
-Համոզմունքը ծնվում է թիմից, իսկ մեր թիմը մրցունակ է, համոզմունքը ծնվում է կատարված աշխատանքից, մնում է, որ հավուր պատշաճի ցույց տանք նախորդ տարիների մեր կատարած աշխատանքը: Մրցակցությունը թեժ կլինի, բայց ՀՀԿ-ն ակնկալելիք արդյունքները կունենա:
Ես որեւէ քաղաքական ուժի թեկնածուին չեմ ուզում թերագնահատել, բայց որեւէ մեկն էլ թող չմտածի, թե ՀՀԿ-ն լավ թեկնածու չի առաջադրել: ՀՀԿ-ն շատ երկար ժամանակ ծանրութեթեւ է արել ու առաջադրել գործող քաղաքապետ Սամվել Բալասանյանի թեկնածությունը: Մյուս կուսակցությունների թեկնածուների առումով ոչինչ չունեմ ասելու, այնտեղ կան նախկին, նաեւ ներկա պատգամավորներ, բայց հավատում եմ մեր թիմի հաղթանակին, մենք կունենանք դրական արդյունքներ:
-Ընդդիմությունը մշտապես դժգոհել է, թե չունենալով անհրաժեշտ քանակի վստահված անձինք, հանձնաժողովի անդամներ, ի վիճակի չէ տեղերում ապահովել վերահսկողություն: Ի՞նչ եք կարծում՝ 10 կուսակցությունները Գյումրիում ունե՞ն այդ անհրաժեշտ ներուժը, կկարողանա՞ն վերահսկողություն իրականացնել, որպեսզի հետընտրական շրջանում չասվի նույնը, թե գործընթացը վերահսկել չկարողացանք, ու իշխանությունը կեղծեց ժողովրդի քվեն:
-Շատ ճիշտ եք ասում, եւ ուրեմն, որպեսզի պարտվելուց հետո չխոսեն, թե ընտրությունները կեղծվել են, ընդդիմությունը շատ խոսելու փոխարեն պետք է գործի ու ընտրատեղամասերում ունենա սեփական վստահված անձինք:
Նաեւ պետք է լինել այնքան կայուն, կազմակերպված թիմ, որ վստահված անձդ չծախվի, կամ էլ կուսակցությունը չծախի իր տեղերը: Գիտեք, այն քաղաքական ուժը, որը դա չի կարող ապահովել, չունի այդքան ներուժ, լավ կլինի լուծարվի ու երբեւէ որպես քաղաքական ուժ հանդես չգա, դաշտն էլ չկեղտոտի:
-Ճի՞շտ են այն տեղեկությունները, թե ՀՀԿ-ն տարբեր լծակներով ճնշում է գործադրում մրցակից կուսակցությունների վրա: Ի դեպ, ճնշումների մասին առավելապես խոսում ու դժգոհում են ԲՀԿ-ականները:
-Ի՞նչ ճնշումների մասին է խոսքը: Ես նման բան չեմ լսել, թե Գյումրիում հանրապետականները ճնշում են մյուս կուսակցությունների թեկնածուներին: Գյումրիում շատ հանգիստ, նորմալ վիճակ է:
Բայց կա նաեւ հետեւյալ հանգամանքը. 422 մարդ ընդգրկված է կուսակցական ցուցակներում: Հիմա, այդ մարդկանցից մեկը կարող է մյուսի հետ հնուց եկող անձնական բարդ հարաբերություններ ունենալ, որքանո՞վ է ճիշտ անձնական հարաբերությունները բերել, կապել քաղաքական պայքարի հետ ու հայտարարել` ճնշում կա:
Նման բան չկա, Գյումրիում ընթանում է զուտ քաղաքական պայքար, իսկ քաղաքական խնդիրները լուծվում են քաղաքական ուժերի ղեկավարների կողմից: Հույս ունեմ, որ ե՛ւ նախընտրական ընթացքը, ե՛ւ ընտրությունները կանցնեն հանգիստ, մրցակցային պայմաններում:
Ա. Սարգսյան
Հոդվածն ամբողջությամբ կարող եք կարդալ «Հայոց աշխարհ» թերթի այսօրվա համարում
