Այս պահին Էրեբունի բժշկական կենտրոնում իրականացնում են «Սասնա ծռեր» խմբի անդամ Արամ Մանուկյանի վիրահատությունը: Պավել եւ Արամ Մանուկյանների պաշտպան Հարություն Բաղդասարյանը լրագրողներին տեղեկացրեց, որ Արամի ոսկրային վիրահատությունն ավարտվել է, հիմա իրականացնում են մկանների համակցումը, քիչ հետո ամբողջ վիրահատությունը կավարտվի:
Այստեղ են նաեւ Պավել Մանուկյանի կինն ու դուստրը: Փաստաբան Հարություն Բաղդասարյանն ասաց, որ ինքը պետք է վստահ լինի, որ Արամի հետվիրահատական գործողությունները, բժշկական միջամտությունները ավարտվել են, որից հետո նոր հնարավոր կլինի տեղափոխել քրեակատարողական հիմնարկ:
Բաղդասարյանը նաեւ տեղեկացրեց, որ միջնորդություն են ներկայացրել վճռաբեկ դատարան՝ իր պաշտպանյալների խափանման միջոց կալանքը գրավի դիմաց փոխել:
Կարդացեք նաև
Aravot.am-ի այն հարցին, թե տեղեկություններ են շրջանառվում, որ Հայաստանի անկախության 25-րդ տարեդարձի կապակցությամբ համաներում է նախատեսվում, արդյոք այն կարող է տարածվել «Սասնա ծռեր» խմբի անդամների վրա, Բաղդասարյանն ասաց, որ համաներումը կտարածվի այն դեպքում, եթե հատուկ նշվի, որ համաներումը տարածվում է նաեւ «Սասնա ծռեր» խմբի վրա, այնպես, ինչպես եղավ Մարտի 1-ի դեպքերի կալանավորվածների ժամանակ:
Բաղդասարյանը այսօր առավոտյան հանդիպել է Պավել Մանուկյանին եւ նրա տպավորությամբ՝ Պավել Մանուկյանն իրեն լավ է զգում, բայց շատ մտահոգված է որդու՝ Արամի վիրահատությամբ եւ առողջական վիճակով:
Մանրամասները՝ տեսանյութում:
Նելլի ԲԱԲԱՅԱՆ
