Օգոստոսի 30-ին «Մոսկվայի տանը» կայացավ Երևան քաղաքի հանրակրթական դպրոցների տնօրենների օգոստոսյան խորհրդակցությունը: Խորհրդակցությանը մասնակցում էին ՀՀ կրթության և գիտության նախարար Լևոն Մկրտչյանը և Երևանի քաղաքապետ Տարոն Մարգարյանը: Վերջինս մինչ խորհրդակցությունը սկսելը շնորհավորեց Շիրազի անվան դպրոցի տնօրենի ծննդյան օրը, ապա քաղաքապետարանի հանրակրթության վարչության պետ Գայանե Սողոմոնյանը հանդես եկավ հաշվետվությամբ:
Տիկին Սողոմոնյանը էկրանին ներկայացրեց հանրակրթության վարչության կողմից կատարված աշխատանքները, ասաց, որ ունեն հարցերի փաթեթ, որոնք կներկայացվեն ԿԳ նախարարին: Այնուհետեւ սկսեց թվարկել հաջողությունները: Հանրակրթության վարչության պետը նշեց, որ իրականացվել է տարվա լավագույն տնօրեն, դաստիարակ, ուսուցիչ մրցույթը: Նա տխուր փաստ համարեց այն, որ մրցույթին մասնակցել է ընդամենը 39 մանկավարժ, այն դեպքում, երբ լավագույն մանկավարժները բազմահազար են: «Այս տարվանից կունենանք նաեւ Երեւան քաղաքի տարվա լավագույն տնօրեն, ուսուցիչ եւ դաստիարակ անվանակարգերը»,-հայտնեց տիկին Սողոմոնյանը:
Նա հավելեց, որ արդեն ատեստավորել է 828 ուսուցիչ, 47 ուսուցիչ առաջին աստիճանի տարակարգ է ստացել: Նշեց, որ 2011 հատուկ կարիքներ ունեցող երեխա է սովորում դպրոցներում, եւ հավաստիացրեց, որ դպրոցները բազմամասնագիտական անձնակազմով ապահովված են: Անդրադարձ եղավ առարկայական օլիմպիադաներին, պարզվեց 45 դպրոցական արժանացել է առաջին կարգի դիպլոմների:
Գայանե Սողոմոնյանը տեղեկացրեց, որ Վահան Տերյանի անվան դպրոցի աշակերտը Գերմանիայում մասնակցել է միջազգային օլիմպիադայի եւ Հայաստանի համար ապահովել երրորդ տեղ: Խոսվեց նաեւ դպրոցականների եւ զինվորների համատեղ միջոցառումների մասին:
Կարդացեք նաև
Ի թիվս այլ թեմաների, անդրադարձ եղավ դպրոցների վերանորոգմանը, պարզվեց, որ վերանորոգվել եւ գույքով վերազինվում է թիվ 88 դպրոցը, եւս 2-ը կվերականգնվի ու կվերազինվի:
Վարչության պետը հավելեց, որ թեժ գիծը շարունակում է գործել, եւ բոլոր դիտողություններն ու ահազանգերն անմիջապես ուսումնասիրվում են:
Թեեւ քաղաքապետը կոչ էր անում հարցեր հնչեցնել ու խոսել խնդիրներից, տնօրենները խուսափում էին սուր անկյուններից եւ ավելի շատ անդրադառնում էին իրենց դպրոցներում ներդրված ծրագրերին կամ կատարած աշխատանքներին: Օրինակ՝ թիվ 98 հիմնական դպրոցի տնօրեն Մարիանա Ավագյանը խոսեց իրենց դպրոցում ներդրված «Թվային դարաշրջանի դպրոց» ծրագրի մասին:
Ավելի ուշ Տարոն Մարգարյանը ցանկություն հայտնեց, որ հասարակությունն ավելի տեղեկացված լինի դպրոցների ձեռքբերումներից, երեխաների ու մանկավարժների հաջողություններից, նաեւ ամրապնդվի ԼՂՀ դպրոցների հետ համագործակցությունը:
Ինչպես նախորդ տարիներին, այս օգոստոսյան խորհրդակցությունն էլ անցավ առանց սուր հարցադրումների:
Գոհար ՀԱԿՈԲՅԱՆ
