Շիրակի մարզի Գյումրի եւ Լոռու մարզի Վանաձոր համայնքներում հոկտեմբերի 2-ին տեղի կունենան համայնքի ավագանու ընտրություններ:
Ընտրություններին մասնակցող կուսակցությունները գրանցման համար անհրաժեշտ փաստաթղթերը պետք է հանձնեին մինչեւ օգոստոսի 28-ը ժամը 18:00-ն: Կենտրոնական ընտրական հանձնաժողովի կայքից տեղեկանում ենք, որ արդեն մի շարք կուսակցություններ գրանցվել են:
Գյումրիում համայնքի ավագանու ընտրություններին մասնակցելու համար առաջադրվել է 4 կուսակցություն՝ Ալյանս առաջադիմական ցենտրիստական, Բարգավաճ Հայաստան, Գաղափարակից լիբերալների ալյանս (ԳԱԼԱ) եւ Հայ ազգային կոնգրես կուսակցությունները:
Իսկ Վանաձորի ավագանու ընտրություններին առաջադրվել է 8 կուսակցություն՝ Բարգավաճ Հայաստան, Լուսավոր Հայաստան, Համախմբում, Հայ ազգային կոնգրես, Հայ հեղափոխական դաշնակցություն, Հայկական վերածնունդ, Հայաստանի Հանրապետական կուսակցություն եւ Քաղաքացիական պայմանագիր կուսակցությունները:
Կարդացեք նաև
Ընտրություններին մասնակցող կուսակցությունների, կուսակցությունների դաշինքների ընտրական ցուցակների գրանցումը կատարվելու է օգոստոսի 28-ից մինչեւ սեպտեմբերի 2-ը: Իսկ նախընտրական քարոզչությունը սկսվելու է սեպտեմբերի 9-ից եւ տեւելու է մինչեւ սեպտեմբերի 30-ը:
Ամի ՉԻՉԱԿՅԱՆ
Հ. Գ. Ավելի ուշ ԿԸՀ կայքում հայտնվեցին եւս 7 կուսակցությունների ցուցակներ:
