«Այն, ինչ գրանցվել է, իրականում մեզ պետք է մտահոգի, ահազանգ պետք է լինի ոչ միայն հանրապետության նախագահի եւ վարչապետի, այլեւ բոլորիս, յուրաքանչյուր հայի համար»,- «Առավոտի» հետ զրույցում ասաց տնտեսագիտության դոկտոր Թաթուլ Մանասերյանը` անդրադառնալով Ազգային վիճակագրական ծառայության՝ օրերս հրապարակած տնտեսական ակտիվության ցուցանիշներին: Դրանց համաձայն՝ հուլիս ամսին աննախադեպ անկում է գրանցվել Հայաստանի տնտեսությունում` 4.3 տոկոս:
Մինչդեռ վերջին հինգ տարիների ընթացքում տնտեսական անկման ամենամեծ ցուցանիշը կազմել է 0.5 տոկոս: Քաղաքական զարգացումները, որոնք նույնպես իրարամերժ բացատրություններ ունեն, ըստ մեր զրուցակցի՝ էական դեր են խաղացել. «Այն, ինչը որ իրականում քաղաքացիական հասունացած խնդիրներ են, ոմանք փորձեցին քաղաքականացնել: Եվ խնդիրն առաջ քաշողները, եւ հանգուցալուծողները, չեմ կարծում, որ ճիշտ մեկնակետերից մոտեցան հարցին: Այստեղ էլ բավական լրջագույն վերլուծության կարիք ունենք, ու չեմ կարծում, թե դրանք պետք է սքողել, ծածկադմփոց անել: Հուլիսյան վերջին դեպքերը լինեն, թե անցած տարվա էլեկտրաէներգիայի թանկացման դեմ ակցիաները Բաղրամյան փողոցում՝ որքան շուտ փորձենք մոռանալ, հետագայում դրանք ավելի շատ ու շուտ կարող են մեզ հիշեցնել: Քաղաքականությունը սերտորեն կապված է տնտեսության հետ, եւ զարմանալի կլիներ, եթե տնտեսությունը դրանից ցնցումներ չապրեր»:
ԱՎԾ-ի «գեղանկարչական» ունակությունների եւ տարվա առաջին կիսամյակի տնտեսական տվյալների վերլուծությունը` կարդացեք վաղվա «Առավոտում»:
Կարդացեք նաև
«Առավոտ»
26.08.2016
