Երեկ ցերեկը միջին տարիքի մի տղամարդ Կիեւյան կամուրջից նետվելու փորձ է կատարել, սակայն վերջին ակնթարթին վրա է հասել ու նրան կանխել է այդ պահին մեքենայով կամրջով ընթացող մի քաղաքացի:
Aravot.am-ին հայտնի դարձավ, որ քաղաքացու կյանքը փրկողը աշխատում է Հայաստանի ազգային օլիմպիական կոմիտեում: Նա Աբգար Բալբանյանն է: Վերջինի պատմելով՝ ինքը օլիմպիական կոմիտեի մեքենայով գնալիս է եղել Դավթաշենում գտնվող Օլիմպիավան: «Կամրջի վրայով ընթանալիս նկատեցի մոտ 50 տարեկան մի տղամարդու, որի պահվածքն ինձ տարօրինակ թվաց: Մեքենայի ընթացքը դանդաղեցրի: Նա ձեռքի տոպրակը նետեց գետնին ու սկսեց բարձրանալ ճաղերի վրա: Թե ինչպես եմ հասցրել արգելակել մեքենան, վազել ու հասնել, չեմ զգացել:
Հիշում եմ, որ երբ հասա այդ տղամարդուն, նա արդեն անցել էր ճաղերից այն կողմ: Հասցրի վերջին ակնթարթին թեւերի տակից գրկել ու ետ բերել: Դրանից անմիջապես հետո վրա հասան երկու ոստիկաններ, որոնք, ենթադրում եմ, որ այդտեղ ծառայություն էին իրականացնում եւ իրենք էլ էին հեռվից նկատել այդ մարդուն: Եկան նաեւ ԱԻՆ-ը, շտապ օգնությունը՝ հոգեբան բժիշկով: Ես արդեն չհետաքրքրվեցի, թե այդ մարդը ով է եւ ինչի համար էր գնում այդ քայլին: Ասեմ միայն, որ նա ալկոհոլ էր օգտագործել՝ երբ նրան գրկեցի, խմիչքի հոտ առա: Երբ արդեն ամեն բան կարգավորվել էր, մոտեցա այդ մարդուն ու ասացի՝ քեզ երկար կյանք եմ մաղթում: Կյանքին ուրիշ աչքերով նայիր, այն հիասքանչ է»:
Հարցին, թե ինչպե՞ս ուժերը բավարարեցին անծանոթին փաստացի օդում պահել, Աբգար Բալբանյանը պատասխանեց. «Չեմ կարող ասել, մի գերբնական ուժ էր: Դեր խաղաց նաեւ այն, որ ժամանակին ջրագնդորդ եմ եղել»:
Աշոտ ՀԱԿՈԲՅԱՆ
А имя Маша.я Находу как бы придумал, но оказалось она Маша