Վերաքննիչ քրեական դատարանը մերժել է «Ոտքի Հայաստան» քաղաքացիական նախաձեռնության անդամ Դավիթ Հովհաննիսյանի գործով բողոքը: Այս մասին լրագրողներին հայտնեց նրա պաշտպան Հովիկ Արսենյանը:
Հիշեցնենք, որ առաջին ատյանի դատարանը Դավիթ Հովհաննիսյանի խափանման միջոցն ընտրել էր 2-ամսյա կալանքը:
«Այսպես եմ հասկանում՝ եթե ժամը 17-ին են նշանակել նիստը, ե՞րբ պետք է հասցնի լսումներ կատարել եւ որոշում կայացնել: Սա արդեն գալիս է նախապես կանխակալ մտածելու, որ դատարանը մերժելու է: Եվ այդպես էլ եղավ. դատարանը գնաց խորհրդակցական սենյակ՝ հայտարարելով, որ 5-10 րոպեից որոշումը կկայացնի, բնական է, որ պետք է թողներ անփոփոխ՝ ընդ որում չբերելով որեւէ պատճառաբանությունը: Առավել եւս, վարույթ իրականացնող մարմինը չկարողացավ հակադարձել պաշտպանական կողմի բերված միջնորդությանը, բողոքին, հիմքերին: Նաեւ վերահսկող դատախազն էր մասնակցում եւ ինչ-որ դասական արտահայտություններ էր անում, որ բավարար հիմքեր են ձեռք բերվել, որպեսզի քրեական հետապնդում իրականացվեր եւ հիմնավոր կասկածներ կան Դավիթ Հովհանիսյանի կողմից կատարած հանցագործության վերաբերյալ, այն է զանգվածային անկարգություններին մասնակցելը»,- ասաց նա:
Հովիկ Արսենյանը նշեց, որ ոստիկանությունը հարկադրաբար փորձել է երթը դադարեցնել եւ օգտագործել է նռնակներ եւ երթը դադարեցվել է: Ըստ նրա, եթե այդ գործողությունների ընթացքում որեւէ քաղաքացի նրանց նկատմամբ գործողություն է կատարել, ապա դա պետք է որակել որպես դիմադրություն:
Կարդացեք նաև
Հետաքրքրվեցինք, թե արդյոք պատրաստվում է որոշումը բողոքարկել, Հովիկ Արսենյանը պատասխանեց՝ անպայման. «Ես ոչ թե իմ պարտականությունն եմ կատարում, այլ ես համարում եմ ինձ Դավիթ Հովհաննիսյան, եւ բոլորն են այդպիսին: Եվ պարտավոր են յուրաքանչյուր քայլ նպատակաուղղված դեպի մարդու իրավունքների ապահովմանը եւ ազատությանը իրենց իրավունքներն օգտագործել, որպեսզի այդ նպատակին հասնենք»:
Ամի ՉԻՉԱԿՅԱՆ
