Կենտրոն եւ Նորք-Մարաշ վարչական շրջանների ընդհանուր իրավասության առաջին ատյանի դատարանում օգոստոսի 25-ին պետք է կայանար «Հիմնադիր խորհրդարանի» անդամ Գեւորգ Սաֆարյանի գործով հերթական նիստ: Սակայն, դատական նիստը հետաձգվեց. ամբաստանյալին դատարան չէին բերել: Գործով հաջորդ նիստը նշանակվել է սեպտեմբերի 27-ին:
Նրա պաշտպան Տիգրան Հայրապետյանը լրագրողների հետ զրույցում նշեց, որ կոնկրետ պատճառ չի կարող ասել, թե ինչու Գեւորգ Սաֆարյանին դատարան չեն բերել: Նա նկատեց, որ նախկինում ընթացքը նորմալ էր՝ շաբաթը 2-3 անգամ դատական նիստեր էին ընթանում, իսկ հիմա հետաձգում են. «Առաջին անգամ, եթե չեմ սխալվում, հուլիսի 18-ին էր դատական նիստ նշանակված, այսինքն՝ այդ խառը ժամանակներն էին, ասացին, որ դատարանը չի պահանջել:
Այդ ժամանակ անզգուշություն ունեցավ քրեակատարողական հիմնարկը, այդպիսի պատասխան տվեց: Հետո՝ հաջորդ դատական նիստին՝ մի քանի օր հետո, արդեն ընդգծված նախագահող դատավորը եկավ եւ հայտարարեց, որ չի ներկայացվել՝ առանց բացատրության: Բայց քրեակատարողական հիմնարկից ճշտեցինք այն ժամանակ՝ անվտանգության նկատառումներից ելնելով է, որ չի եկել: Այսօր անտրամաբանական է, թե ինչու չի եկել: Ամենայն հավանականությամբ, «Սասնա ծռերի» իրավիճակը շարունակվում է»:
Կարդացեք նաև
Տիգրան Հայրապետյանի ենթադրությամբ՝ կարծում են, որ եթե քրեակատարողական հիմնարկից բերեն Գեւորգ Սաֆարյանին կարող է հանրահավաք լինի. «Այն որ Գեւորգ Սաֆարյանը ակնհայտ անօրինական պահվում է, որեւէ մեկի համար գաղտնիք չէ: Ամեն ինչ տեսանկարահանված է եւ վաղուց արդեն պետք էր որոշում կայացնել, գոնե կալանքը որպես խափանման միջոց վերացնել: Ես չեմ կարողանում հասկանալ, ինչ է կատարվում»:
Հիշեցնենք, որ «Հիմնադիր Խորհրդարան»-ի անդամ, քաղաքացիական ակտիվիստ Գեւորգ Սաֆարյանը հունվարի մեկին բերման էր ենթարկվել Ազատության հրապարակից` «Հիմնադիր Խորհրդարան»-ի անդամների եւ ոստիկանների միջեւ տեղի ունեցած միջադեպի պատճառով: Նա մեղադրվում է ոստիկանության մայոր Գեղամ Խաչատրյանին հարվածելու համար:
Ամի ՉԻՉԱԿՅԱՆ
