Վերջին ամիսների ընթացքում անընդհատ լուրեր կային, որ այն դպրոցներում, որտեղ նախկին տնօրենները փոխտնօրեն են աշխատում, նրանցից պահանջում են աշխատանքից ազատվելու դիմում գրել: Երևանի ավագանու «Բարև Երևան» խմբակցության անդամ Անահիտ Բախշյանը այս առիթով հարցում է ուղղել Երեւանի քաղաքապետին: Այսօր «Հայելի» մամուլի ակումբում տիկին Բախշյանը լրագրողներին ներկայացրեց իր հարցման պատասխանը: Դրանում հղում է արվում ՀՀ աշխատանքային օրենսգրքի մի կետի, համաձայն որի մարդը ինչ-ինչ պատճառներով կարող է մինչեւ 65 տարին լրանալն աշխատել: Փոխտնօրեն աշխատող նախկին տնօրենների պայմանագրերում այդ կետը կա, բայց խնդիրն այն է, որ այդ մարդիկ 65 տարին լրացած են եղել, որ տնօրենի պաշտոնից ազատվել են: Հետեւաբար, հակասություն է առաջանում:
«Ես խորհրդակցել եմ աշխատանքի տեսչությունում ու պարզվում է, որ այդ կետը սխալ հիմնավորում է ու նրանց չեն կարող պայմանագրի այդ կետով ազատել աշխատանքից»,- ասաց Անահիտ Բախշյանը:
Բանախոսի կարծիքով, քաղաքապետարանն այս քայլը ձեռնարկել է նրա համար, որ շատ դպրոցներում տնօրեն մայրերին փոխարինեցին դուստրերը կամ հարսները: Ինքը նման չորս դպրոց գիտե` Պուշկինի անվան, Նիկոլ Աղբալյանի անվան, 121 եւ 89 դպրոցները: «Տեղեր էլ կան, որ ազգակցական կապ չկա, բայց նախկին տնօրենը մնում է իր սենյակում`օգտագործելով իր ազդեցությունը, թույլ չի տալիս նոր տնօրենը կայանա: Քաղաքապետն էլ թացն ու չորը խառնելով փորձում է հարցը լուծել: Բայց այսպիսով դպրոցների ինքնավարությունն է վերցվում»,- ասում է Անահիտ Բախշյանը` հավելելով, որ ազատված նախկին տնօրենները եթե դատարան դիմեն`կշահեն, ՍԴ-ի նախադեպային որոշում կա:
Մանրամասները` տեսանյութում
Կարդացեք նաև
Բախշյանը դիմել է քաղաքապետին, որպեսզի իրեն ցուցակ տրամադրվի, թե արդեն ովքե՞ր են դիմումներ գրել: Ցուցակը չի տրամադրվել:
Հարցին`խնդիրը ո՞րն է, որ նախկինում քաղաքապետարանը համաձայն էր նման կարգով աշխատեն նախկին տնօրենները, իսկ հիմա`ոչ, Անահիտ Բախշյանն ասաց, որ պատճառը հավանաբար տարբեր հասարակական դժգոհություններն են, բայց այդ պարագայում կարելի էր տնօրենների նշանակման կարգում փոփոխություն կատարվի`արգելելով նախկին տնօրենի`փոխտնօրեն աշխատելը:
Թեպետ իր նշանակման առաջին օրերին նորանշանակ ՀՅԴ-ական նախարարն ասաց, որ ժառանգականության խնդրով կզբաղվի, բայց Անահիտ Բախշյանը նկատում է`նախարարության ենթակայության դպրոցներում նման շարժ չկա:
Նելլի ԳՐԻԳՈՐՅԱՆ
