Аzatutyun.am. Ռուսաստանի Քննչական կոմիտեն հայտնել է Ուկրաինայի պաշտպանության նախարար Ստեփան Պոլտորակի և մի շարք այլ բարձրաստիճան ուկրաինացի զինվորականների դեմ քրեական գործ հարուցելու մասին:
ՔԿ-ի պաշտոնական կայքէջում տեղադրված հաղորդագրության համաձայն՝ կոմիտեն գործ է հարուցել ՌԴ Քրեական օրենսգրքի 356-րդ հոդվածով՝ նախարար Պոլտորակին, Ուկրաինայի Գլխավոր շտաբի պետին, Ազգային գվարդիայի ղեկավարին, ԶՈւ ցամաքային զորքերի նախկին հրամանատարին և այժմ նրան փոխարինողին մեղադրելով, այսպես կոչված, Դոնեցկի ժողովրդական հանրապետության և Լուգանսկի ժողովրդական հանրապետության քաղաքացիական բնակչության հանդեպ հակաիրավական գործողություններ կազմակերպելու մեջ:
ՌԴ Քննչական կոմիտեն համարում է, որ 2016 թվականին ուկրաինացի զինվորականները բազմիցս խախտել են հրադադարը՝ գնդակոծելով քաղաքացիական օբյեկտներ, ինչի հետևանքով 7 մարդ է զոհվել: Օգոստոսի 22-ին հայտնի դարձավ, որ Ուկրաինայի Գլխավոր դատախազությունը հետախուզում է հայտարարել ՌԴ պաշտպանության նախարար Սերգեյ Շոյգուի և ևս 17 ռուսաստանցի բարձրաստիճան պաշտոնյաների նկատմամբ: Ուկրաինան նրանց կասկածում է երկրի անվտանգության դեմ հանցագործություններ կատարելու մեջ:
Ուկրաինայի գլխավոր դատախազ Յուրի Լուցկոն հայտարարել էր, որ Շոյգուի և մնացյալ կասկածյալների գործողությունների հետևանքով 2263 ուկրաինացի զինծառայող է զոհվել:
