ՀՀ վերաքննիչ քրեական դատարանը մերժեց Անդրիաս Ղուկասյանի խափանման միջոցը փոխելու մասին բողոքը: Հիշեցնենք, Անդրիաս Ղուկասյանի շահերի պաշտպան Լուսինե Սահակյանը բողոքարկել էր իր պաշտպանյալի ձերբակալման օրինականության հարցը: Ինչպես նաեւ, առաջարկել էր Անդրիաս Ղուկասյանին եւս գրավի դիմաց ազատ արձակել: Դատարանը մերժել է երկու բողոքներն էլ: Անդրիաս Ղուկասյանը դեռեւս առնվազն մեկ ամիս կմնա անազատության մեջ:
Անդրիաս Ղուկասյանին, հիշեցնենք, ձերբակալել էին հունիսի 30-ի առավոտյան: Նա մեղադրվում է զանգվածային անկարգություններ կազմակերպելու մեջ՝ ՀՀ Քրեական օրենսգրքի 225-րդ հոդվածի 1-ին մասով:
Կարդացեք նաև
Փաստաբանն ակնհայտ է համարում փաստը, որ իր պաշտպանյալի նկատմամբ քաղաքական հետապնդում է իրականացվում: Իբրեւ իր հայտարարության ապացույց, նա իրեն իրավունք վերապահեց դռնփակ դատական նիստից մի դրվագ ներկայացնելու. «Դատարանը հատուկ հարց ուղղեց Անդրիաս Ղուկասյանին, թե եթե նա ազատ արձակվի, արդյոք շարունակելու է իր ընդդիմադիր գործունեությունը: Անդրիաս Ղուկասյանն, իհարկե, պատասխանեց, որ ինքն իր գործունեությունը շարունակելու է եւ որեւէ փոփոխություն իր գործունեության ու ընդդիմադիր կեցվածքում չի լինելու: Ակնհայտ է, որ սա շատ էական նշանակություն ունեցավ եւ դատավորը նույնիսկ չհասկացավ, որ ինքը պետք է գոնե քողարկված որոշում կայացնի: Եթե մինչ այս պահը մենք նշում էին, որ նա քաղաքական հետապնդումների զոհ է, քաղաքական բանտարկյալ է, այսօր արդեն դատարանն էլ իր գործողություններով դա հիմնավորեց»:
Լուսինե Սահակյանն ասաց, որ եթե մինչեւ այժմ տարբեր պաշտոնյաներ հեռախոսով կամ առանձնազրույցների ժամանակ էին իր պաշտպանյալին սպառնում, որ եթե շարունակի իր ընդդիմադիր գործունեությունը, ապա անազատության մեջ կհայտնվի, ապա այսօր ակնհայտ դարձավ, որ նրանք կատարեցին իրենց խոստումը`արձանագրվող դատական նիստի պայմաններով:
Փաստաբանն էական է համարում նաեւ դատավորի ով լինելը ու եզրակացնում է, որ Անդրիաս Ղուկասյանի նկատմամբ կա հատուկ վերաբերմունք. «Կարծես թե հատուկ վրեժ են լուծում իրենից`իր ելույթներով պայմանավորված»:
Այսօր, ի դեպ, Անդրիաս Ղուկասյանի հացադուլի 24-րդ օրն է: Փաստաբանն ասաց, որ նա շարունակելու է իր հացադուլը:
Լուսինե Սահակյանն ընթերցեց նաեւ իր պաշտպանյալի հայտարարությունը, որով Անդրիաս Ղուկասյանը հանրությանը համախմբման կոչ է անում, իսկ երիտասարդությանը`նախաձեռնողականության եւ առավել ակտիվության: Լուսինե Սահակյանը լրագրողներին ասաց նաեւ, որ իր պաշտպանյալը դատարանում ելույթ է ունեցել, ներկայացրել իր դիրքորոշումները, որոնք հայտնի են:
Լուսինե Սահակյանը պնդում է, որ ոչ առաջին ատյանում, ոչ էլ վերաքննիչ դատարանում ոչ դատախազը, ոչ քննիչը իր պաշտպանյալի ձերբակալության համար որեւէ հիմք, ապացույց չեն ներկայացրել: Դատարանն իր այսօրվա որոշումը հիմնավորել է նրանով, որ քանի որ գործը նախաքննության փուլում է, Անդրիաս Ղուկասյանը կարող է դատավարության մասնակիցների վրա ազդեցություն գործադրել:
«Ժառանգություն» կուսակցության փոխնախագահ Արմեն Մարտիրոսյանն, ով նույնպես ազատ արձակվեց գրավի դիմաց, լրագրողների հետ զրույցում ասաց, որ իր եւ մյուսների օրինակով կարծում էր թե գրավի դիմաց ազատ արձակելու տենդենցը շարունակվելու է: «Եթե Հովսեփ Խուրշուդյանի նկատմամբ էլ նման որոշում կայացվի, ապա նշանակում է, որ ինչ-որ իրավիճակ է փոխվել, նորից որոշել են իրենց ապօրինի գործունեությունը շարունակեն: Իսկ եթե Հովսեփին ազատ արձակեն, կնշանակի, որ Անդրիասի նկատմամբ անձնական հաշվեհարդար են տեսնում»:
Անդրիաս Ղուկասյանի կինը`Անահիտ Թարխանյանն էլ ամուսնու նկատմամբ վերաբերմունքը միանշանակ քաղաքական է համարում: Ասում է, երեկ ողջ գիշեր նրա վերջին ելույթներն է նայել. «Արտահայտվում է շատ պարզ, ոչ թե էմոցիոնալ, զգացմունքային, այլ հստակ նշելով այս կամ այն հոդվածները, որոնց համար նույն Սարգսյանը որտեղ է մեղավոր, որտեղ խնդիր ունի եւ ինչի համար պարտավոր է պատասխան տալ: Էդպիսի մարդուն դժվար թե բաց թողնեին, հազիվ իրենց ձեռքն է ընկել»: Տիկին Թարխանյանն ասաց նաեւ, որ ինքն այնուհանդերձ, գրավի գումարն առանձնացրել էր:
Նելլի ԳՐԻԳՈՐՅԱՆ
