«Այստեղ խնդիրը ոչ միայն Պերմյակովի նկատմամբ ինչ-որ տեսակ պատժատեսակ սահմանելն էր, այլ նաեւ բոլոր այն մարդկանց բացահայտելը, որոնց գործունեության կամ անգործության պատճառով տեղի ունեցավ նման հանցագործություն»,- օգոստոսի 24-ին «Մեդիա կենտրոնում» լրագրողների հետ հանդիպման ընթացքում ասաց Գյումրիում սպանված Ավետիսյանների իրավահաջորդի ներկայացուցիչ Արամազդ Կիվիրյանը:
Հիշեցնենք, որ երեքշաբթի Շիրակի մարզի ընդհանուր իրավասության դատարանը Վալերի Պերմյակովին դատապարտեց ցմահ ազատազրկման:
Արամազդ Կիվիրյանը նշեց, որ իրենք քաղաքացիական հայց են ներկայացրել դատարան, որը դատարանը վարույթ է ընդունել եւ որպես քաղաքացիական հայցվոր ճանաչել է տուժողների իրավահաջորդներին, իսկ պատասխանող՝ Ռուսաստանի Դաշնությանը. «Դատարանը հետաձգեց դատական նիստը 1 ամիս ժամկետով, որպեսզի թարգմանի եւ ուղարկի Ռուսաստանի Դաշնություն, որ Ռուսաստանի Դաշնությունը դիրքորոշում արտահայտի: Սակայն, 1 ամիս հետո դատական նիստի ընթացքում որոշում կայացվեց, որ այդ հայցադիմումը հրաժարվում է վարույթ ընդունել:
Այստեղ միայն հարցն այն չէ, որ ինքը Ռուսաստանի Դաշնության դեմ չի ուզում քննել գործ, այո՛, այդ փաստը կա, բայց ինչո՞ւ: Որովհետեւ քաղաքացիական հայցի հենց փաստական հիմքում դրվել էին այդ հանգամանքները, որ տեղի են ունեցել դասալքության դեպքեր, ռուսական կողմի մեղավորության փաստական հանգամանքները հիմնավորող փաստեր են դրվել, եւ եթե քաղաքացիական հայցն ընդունվում է վարույթ, դատարանը ստիպված էր անդրադառնալ այդ հանգամանքներին, այդ փաստերին պարտավոր էր գնահատական տալ»:
Կարդացեք նաև
Արամազդ Կիվիրյանն ասաց, որ իրենք դժգոհ են դատարանի գործելաոճից, որ դատարանը չունեցավ այն կամքը եւ չցանկացավ Ռուսաստանի Դաշնության դեմ քննարկել այդ հարցը: Այդ որոշումը բողոքարկվել է, սակայն Վերաքննիչ քրեական դատարանը առանց քննության է թողել՝ պատճառաբանելով, որ այդ որոշումը ենթակա չէ բողոքարկման: Կողմը ներկայացրել է նաեւ վճռաբեկ բողոք:
Ամի ՉԻՉԱԿՅԱՆ
Լուսանկարը՝ «Մեդիա կենտրոնի»:
