Գյումրիի քաղաքապետի ընտրությունների դեպքում կարծես թե այնքան էլ չի ստացվում ընդդիմադիր ուժերի լայն համախմբումը, որը ամիսներ առաջ նախաձեռնել էր ԳԱԼԱ հեռուստաընկերության ղեկավար Վահան Խաչատրյանը։
Վերջինս այդ նպատակով բանակցություններ է ունեցել «Ժառանգություն», ՀԱԿ, «Քաղաքացիական պայմանագիր», «Լուսավոր Հայաստան», «Համախմբում» եւ այլ կուսակցությունների հետ։ ՔՊ-ն հայտարարել է ընտրություններին առանձին մասնակցելու մասին, «Ժառանգությունը» վերջերս հայտարարեց, որ չի մասնակցելու ընտրություններին, քանի որ ձերբակալված են կուսակցության երեք առանցքային դեմքերը՝ փոխնախագահ Արմեն Մարտիրոսյանը, Դավիթ Սանասարյանը եւ Հովսեփ Խուրշուդյանը։ Առաջին երկուսին օրեր առաջ թեեւ ազատ արձակեցին, բայց միեւնույն է, «Ժառանգությունը» չփոխեց իր դիրքորոշումը։ Մեզ հետ հեռախոսազրույցի ընթացքում Վահան Խաչատրյանը փոխանցեց, որ անգամ այս դեպքում այդ կուսակցության հետ որոշակի համագործակցությունը չի բացառվում։ Կօգտագործվի «Ժառանգության» մարդկային ռեսուրսը, միգուցե որոշ անդամներ ընդգրկվեն ավագանու իրենց ցուցակում։
Իսկ ՀԱԿ-ի եւ «Լուսավոր Հայաստանի» հետ քննարկումները դեռ շարունակվում են։ Բանակցում են նաեւ «Հայազն», «Առաքելություն» եւ այլ կուսակցությունների հետ, ու մի քանի օրից պարզ կդառնա, թե ինչպես են մասնակցելու ընտրություններին, թեկուզեւ փոքրաթիվ կուսակցություններով՝ բայց համախմբում ի վերջո լինելո՞ւ է, թե՞ ոչ։
Որոշ տեղեկությունների համաձայն, այս պահին կուսակցությունների հետ բանակցություններն այնպիսի արդյունք են տվել, որ մեծ է հավանականությունը, թե արդեն ԳԱԼԱ նորաստեղծ կուսակցությունը հոկտեմբերի 2-ին Գյումրիի քաղաքապետի ընտրություններին առանձին մասնակցի։ Ինքը՝ Վ. Խաչատրյանը, չբացառեց այդ հնարավորությունը եւ խոստովանեց, որ նախապես պատկերացրած լայն համախմբումը չի ստացվում։ Վերջինս նախընտրական մեծ դաշինք կազմելու նախաձեռնության չստացվելը բացատրեց ընտրություններին մասնակցել- չմասնակցելու, մասնակցության ձեւաչափի եւ այլ հարցերի վերաբերյալ քաղաքական ուժերի դեռ հստակ կողմնորոշվածություն չունենալով, ինչպես նաեւ՝ ամբիցիաներով։ «Ճիշտն ասած՝ ես ավելի լուրջ կարծիք ունեի քաղաքական ուժերի մասին, հիմա փոխել եմ»,- ասաց նա։
Կարդացեք նաև
Ի դեպ, նշենք, որ Գյումրիի եւ Վանաձորի ավագանու ընտրությունների առաջադրման մեկնարկից անցել է արդեն յոթ օր, եւ ընդամենը հինգ օր է մնացել փաստաթղթերի ներկայացման համար, բայց Կենտրոնական ընտրական հանձնաժողով դեռ որեւէ կուսակցություն մասնակցության դիմում չի ներկայացրել։
Արմինե ԱՎԵՏՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
