Վերաքննիչ քրեական դատարանում օգոստոսի 23-ին քննվում էր «Սասնա ծռեր» խմբավորման անդամներին հաց տանող Արթուր Սարգսյանի գործով վերաքննիչ բողոքը:
Արթուր Սարգսյանի պաշտպան Տիգրան Եգորյանը լրագրողների հետ զրույցի ընթացքում ասաց. «Ինչպես հայտնի է, ամսի 2-ին առաջադրված մեղադրանքի էությունն այն էր, որ Արթուր Սարգսյանը զինված խմբի կազմում նախնական համաձայնության շրջանակներում հուլիսի 17-ին մտել էր ՊՊԾ գնդի տարածք եւ արել էր այն ամենը, ինչ խմբի մյուս անդամները: Եվ այդ մեղադրանքի հիման վրա դատարան ներկայացված որպես խափանման միջոց կալանք ընտրելու միջնորդությունը դատարանը բավարարել էր՝ նշելով, որ գործի քննության արդյունքում պարզեց, որ Արթուր Սարգսյանը իսկապես հուլիսի 17-ին առավոտյան 5:30 մտել է գնդի տարածք: Դա տեղի ունեցավ ամսի 3-ին:
Ամսի 4-ին Արթուր Սարգսյանին առաջադրված մեղադրանքը փոխվեց, որտեղ նշվեց՝ Արթուր Սարգսյանը գունդը գրավելու գործողությանը չի մասնակցել, փոխարենը՝ նրան առաջադրվեց նոր մեղադրանք՝ այդ գործողությունները կատարելուն օժանդակելը: Սա աներկբա փաստ է, որը վերացնում է այս պահին Արթուր Սարգսյանի նկատմամբ կիրառված կալանավորման հիմքերը, որովհետեւ բոլոր այն հիմքերը, որոնք կիրառել է դատարանը իր որոշումը հիմնավորելու համար, վերացել են, առաջադրված մեղադրանքը վերացել է, փոփոխվել է, լրիվ այլ մեղադրանք է առաջադրվել»:
Տիգրան Եգորյանը նշեց, որ դատարանը անհրաժեշտ համարեց հարցեր ուղղել դատախազին եւ վարույթ իրականացնող մարմնին, սակայն դատախազը ներկա չէր դատական նիստին: Հաջորդ դատական նիստը տեղի կունենա օգոստոսի 25-ին:
Կարդացեք նաև
Ամի ՉԻՉԱԿՅԱՆ
