«Մենք այդ մեթոդը չէինք ընդունում եւ ոչնչով չնպաստեցինք վիճակի լարմանը, քանի որ լուրջ էր պետության եւ պետականության առջեւ կանգնած վտանգը»,- այսօր «Հայացք» մամուլի ակումբում ասաց ՀԱԿ խմբակցության պատգամավոր Արամ Մանուկյանը`պատասխանելով հարցին` ՀԱԿ-ն իշխանափոխության ի՞նչ ձեւ է տեսնում, ճի՞շտ էր «Սասնա ծռերի» ընտրած ձեւը: Նա ասաց, որ ՊՊԾ գնդի գրավման օրերին ՀԱԿ առաջնորդը, իր գործընկերները հանդես են եկել հայտարարություններով եւ ինքը դրանք կիսում է:
«Ռիսկը եւ արտաքին մարտահրավերներն այնպիսին են, որ Հայաստանը կարող է կանգնել աղետի առջեւ: Մենք ոչնչով ապահովագրված չենք, քան Ուկրաինան, Վրաստանը, Սիրիան: Հայաստանը իրավունք չունի ռիսկի տակ դնի ժողովրդի`այստեղ ապրելու իրավունքը: Մենք այդքան հզոր չենք, որ հզորներին թելադրենք, մենք այնպես պետք է խաղանք, որ մեծերի ոտքի տակ չընկնենք»,- ասաց նա`հավելելով, որ բռնությունը իշխանափոխության մեթոդ չի, որքան էլ բռնություն կիրառողներն անկեղծ են, հայրենասեր են, իր ընկերներն են:
Լրագրողի դիտարկմանը`դուրս գայիք եւ կանխեիք լարումները, Արամ Մանուկյանը պատասխանեց. «Տոնդ շնորհավոր»:
Մեկ այլ հարց-դիտարկմանը, որ որոշ կուսակցություններ իշխանափոխությունը տեսնում են ընտրական գործընթացներում, օրինակ՝ ՏԻՄ ընտրություններին մասնակցելով, մինչդեռ ՀԱԿ-ն այս առումով էլ ակտիվ չէ, բանախոսն ասաց, որ ՀԱԿ-ը կարեւորում է Գյումրու եւ Վանաձորի ընտրությունները. «Թեկնածուներ ունենք, ցուցակները կազմած են: Երկու տեղում էլ կլինեն բաց ցուցակներ, փորձելու ենք մեր շուրջ հնարավորինս լայն կոնսոլիդացիա ստեղծել: Վաղը չէ մյուս օրը մեր վարչության նիստն է, որտեղ կհաստատվեն ցուցակները եւ կհրապարակվեն թեկնածուների անունները»:
Կարդացեք նաև
Նելլի ԳՐԻԳՈՐՅԱՆ
