Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում (նախագահող դատավոր’ Արմեն Բեկթաշյան) օգոստոսի 22-ին կայացավ անցյալ տարվա նոյեմբերի 25-ին Երևանում, Նորք Մարաշ վարչական շրջանի 9-րդ փողոցի սեփական տներից մեկում վնասազերծված զինված խմբի անդամներից չորսին (Հակոբ Հակոբյան, Անուշավան Ավետիսյան, Հարություն Հովհաննիսյան, Ստեփան Չիլինգարյան) վերաբերող քրեական գործով դատավարությունը:
Այս քրեական գործը, որպես մաս, անջատվել է «մայր» գործից եւ առաջինն է ներկայացվել դատարանի քննությանը, քանի որ նրանց համեմատաբար մեղմ մեղադրանքներ են առաջադրված: Ըստ մեղադրական եզրակացության, այդ չորսի արարքներում կա չիմացության հանգամանքը, այսինքն` չեն իմացել, որ զենքերը, ռազմամթերքն ու պայթուցիկ նյութերը նախատեսվում են Հայաստանում իշխանության զավթման ժամանակ, ըստ անհրաժեշտության, գործածելու համար: Հակոբ Հակոբյանը, Անուշավան Ավետիսյանը, Հարություն Հովհաննիսյանը եւ Ստեփան Չիլինգարյանը, Գյումրիի բնակիչներ են:
Հակոբ Հակոբյանին և Անուշավան Ավետիսյանին մեղադրանք է առաջադրվել ՀՀ քրեական օրենսգրքի 235-րդ հոդվածի («Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը») 2-րդ, իսկ Հարություն Հովհաննիսյանի և Ստեփան Չիլինգարյանին’ նույն հոդվածի 1-ին մասով, բոլոր չորսի նկատմամբ ընտրված խափանման միջոցը կալանքն է:
Կարդացեք նաև
Օգոստոսի 22-ին կայացած դատական նիստի ժամանակ որոշվեց արագացված դատաքննության կարգ կիրառել, դատարանը հետազոտեց գործում առկա փաստաթղթերը’ պատասխանատվությունը մեղմացնող փաստաթղթերը, դրական բնութագրերը տարածքից, հարեւաններից, աշխատավայրերից եւ այլն: Օրինակ, Ի թիվս, այլ փաստաթղթերի, Հարություն Հովհաննիսյանի որդու հոգեկան վիճակի մասին փաստաթուղթ ներկայացվեց, որտեղ նշված էր, որ երեխան չի ցանկանում դպրոց գնալ, ձգտում է մեկուսացման, անընդհատ վախեցած է եւ թույլ չի տալիս լույսն անջատել: Բժիշկները տղայի մոտ ախտորոշել են հորից բաժանվելու պատճառով պայմանավորված տագնապային խանգարում:
Բոլոր ամբաստանյալները համաձայնեցին մեղադրանքի հետ եւ ընդունեցին իրենց առաջադրված մեղադրանքը:
Մեղադրողը երկու աշխատանքային օր ժամանակ խնդրեց ճառին պատրաստվելու համար:
Հաջորդ նիստը կկայանա օգոստոսի 30-ին ժամը 12-ին:
Գոհար ՀԱԿՈԲՅԱՆ
