Այսօր Վերաքննիչ դատարանը մերժել է «Սասնա ծռեր» խմբի անդամ Պավլիկ Մանուկյանի խափանման միջոցը՝ կալանքը փոխելու միջնորդությունը: Այդ մասին քիչ առաջ լրագրողների ետ զրույցում ասաց Պավլիկ Մանուկյանի պաշտպան, փաստաբան Հարություն Բաղդասարյանը (լուսանկարում)՝ հավելելով, որ դեռ որոշումը դատարանից չի վերցրել, հիմնավորումը պարզ չէ, բայց կարող է ենթադրել. «Ինչպես բոլոր դեպքերում, այն է՝ կարող է խուսափի, թաքնվի, այլ արարքներ անի: Ենթադրում եմ, որովհետև, որպես կանոն, հիմնավորումն այդպիսին է լինում»:
Հարություն Բաղդասարյանը հարցին՝ արդյոք ի վիճակի՞ է Պավլիկ Մանուկյանը թաքնվել, այն մտավախությունը, որ ունի դատարանը, իրատեսակա՞ն է՝ պատասխանեց. «Լավ կլիներ լրագրողները դատավորներին այդ հարցը տային, թե իրենք ինչպե՞ս են պատկերացնում երկու ոտքից վիրավոր անձը պետք է թողնի ՀՀ տարածքը, առավել եւս, երբ նա ունի բուժման կարիք: Երկրորդը՝ ինչպես են պատկերացնում, թե այն մարդիկ, որոնք հեղափոխական պայքարի են ելել, պետք է թողնեն երկրի տարածքը: Ինձ թվում է, ցանկացած նմանատիպ հարցեր լուծվում են ոչ թե իրավական, այլ քաղաքական ճանապարհով»:
Այսօր Պավլիկ Մանուկյանը պետք է վիրահատվեր: Փաստաբանն ասաց, որ դեռ որեւէ տեղեկություն չունի, թե ինչպես է անցել վիրահատությունը:
Պավլիկ Մանուկյանը, Հարություն Բաղդասարյանի պատմելով՝ հայտարարել է. «Եթե նույնիսկ ինձ աքսորեն էլ, արտաքսեն էլ երկրից, ես, միեւնույն է, կվերադառնամ: Մանուկյանի խոսքերում հստակ հնչում էր այն տարբերակը, որ տարիներ շարունակ մենք թողել ենք ձեզ, մենք փորձել ենք, որ դուք ինչ-որ մի ձեւով այս ամենը կվերացնեք, փորձել ենք այլ ճանապարհներով այդ հարցերը բարձրացնել՝ չեք արել ու բերեց Դավթի խոսքը «Սասնա ծռերի», որ արդեն զարկի հերթը իմն է: Ժողովուրդ, ես ձեզ համար որպես սուր, դուք ինձ որպես սուր օգտագործեք՝ հաղթանակի հասնելու համար»:
Կարդացեք նաև
Հռիփսիմե ՋԵԲԵՋՅԱՆ
