Մինչեւ Հայաստանի` ԵՏՄ-ին անդամակցելն ասվում էր, որ Հայաստանը կարող է դառնալ կամուրջ` ԵՏՄ-ի եւ Իրանի միջեւ, սակայն որեւէ մեկը չէր հարցնում` արդյոք Ռուսաստանը զգո՞ւմ է իրանական ապրանքների կարիքը, եւ ԵՏՄ անդամ-երկրների ո՞ր շուկաներն են հետաքրքրում Իրանին: Այս մասին այսօր` օգոստոսի 18-ին Միջազգային և անվտանգության հարցերի հայկական ինստիտուտում «ԵՏՄ հարավային ֆլանգ. Կրեմլը ցայտնոտի մեջ» թեմայով փորձագիտական քննարկման ժամանակ ասաց տնտեսագետ Աշոտ Եղիազարյանը:
Նա նշեց, որ Ռուսաստանը նախընտրեց իրանական ապրանքներ ընդունել ոչ թե Հայաստանի, այլ Ադրբեջանի տարածքով. «Ըստ էության, Ադրբեջանը ոտք է դնում հետնավթային դարաշրջան: Իսկ մեր վիճակը ծանր է: Հայաստանը կորցրել է իր սուվերենությունը` անդամակցելով ԵՏՄ-ին եւ ՀԱՊԿ-ին: Մնալով այդ բլոկներում` Ռուսաստանը Հայաստանի վրա ունենում է եթե ոչ տնտեսական, ապա քաղաքական եւ ռազմական ազդեցության լուրջ լծակներ»:
Այս իրավիճակում, ըստ Աշոտ Եղիազարյանի, Հայաստանը պետք է արագորեն դուրս գա ԵՏՄ-ից եւ ՀԱՊԿ-ից, կնքի եվրաասոցացման համաձայնագիրը, իսկ Իրանի հետ` բարենպաստ առեւտրի պայմանագրեր»:
Լուիզա ՍՈՒՔԻԱՍՅԱՆ
