Վերջերս տեղի ունեցած Պուտին-Սարգսյան հանդիպման ժամանակ Սերժ Սարգսյանն ասաց, որ 2016 թվականի առաջին կիսամյակում երկկողմանի (ՌԴ-ՀՀ) ապրանքաշրջանառությունը աճել է 12 տոկոսով։ Փորձենք համեմատել այդ թիվը Տիգրան Սարգսյանի գլխավորած Եվրասիական տնտեսական հանձնաժողովի կայքում 2016թ. առաջին կիսամյակի համար ներկայացված պաշտոնական վիճակագրության հետ։
Այսպիսով, ըստ ԵԱՏՄ պաշտոնական վիճակագրության Եվրասիական տնտեսական միության արտաքին ապրանքաշրջանառությունը 2016թ. առաջին կիսամյակում կազմել է 228,6 միլիարդ ԱՄՆ դոլար (արտահանումը 140,5, իսկ ներմուծումը՝ 88,1 միլիարդ դոլար): Անցած տարվա նույն ժամանակահատվածի հետ համեմատած արտաքին ապրանքաշրջանառության ծավալը նվազել է 23%-ով: Ապրանքների արտահանման ծավալը նվազել է 29,3%-ով, իսկ ներկրման ծավալը՝ 10,3 տոկոսով:
ԵԱՏՄ փոխադարձ ապրանքաշրջանառությունը 2016թ. առաջին կիսամյակում նախորդ տարվա նույն ժամանակահատվածի նկատմամբ նվազել է 17 տոկոսով և կազմել 19 միլիարդ դոլար:
Հայաստանը ԵԱՏՄ-ում
Կարդացեք նաև
Հայաստանի Հանրապետության ապրանքաշրջանառությունը Բելառուսի հետ 2016թ. առաջին կիսամյակում կազմել է 13,8 միլիոն դոլար, ինչը նախորդ տարվա նույն ժամանակահատվածի հետ համեմատած նվազել է 24,3 տոկոսով: ՀՀ ապրանքաշրջանառությունը Ղազախստանի հետ նվազել է 17,3%-ով և կազմել 2,3 միլիոն դոլար: Ղրղզստանի հետ մեր ապրանքաշրջանառությունը կազմել է 0,1 միլիոն դոլար , ինչը 2015թ.-ի առաջին կիսամյակի հետ համեմատած 39,8 տոկոսով պակաս է 2016թ.-ի հետ համեմատած:
ՀՀ ապրանքաշրջանառությունը Ռուսաստանի հետ 2016թ.-ի առաջին կիսամյակում կազմել է 537,7 միլիոն ԱՄՆ դոլար: Այն նախորդ տարվա նույն ժամանակահատվածի հետ համեմատած նվազել է 5,8 տոկոսով: Համեմատելով այս թվերը Սերժ Սարգսյանի հնչեցրածի հետ, տեսնում ենք, որ ՀՀ-ի և ՌԴ-ի միջև ապրանքաշրջանառությունը այս տարի նախորդ տարվա նկատմամբ ոչ միայն 12 տոկոս աճ չի գրանցել, այլ արձանագրվել է 5,8 տոկոսանոց անկում։ Անհասկանալի է, թե որ տարվա հետ համեմատած է Սարգսյանը տեսել այդ աճը։
Ռուսաստանը ԵԱՏՄ-ում
2016թ-ի առաջին կիսամյակում նախորդ տարվա հետ համեմատած Ռուսաստանի ապրանքաշրջանառությունը նվազել է նաև մնացած բոլոր ԵԱՏՄ երկրների հետ: Մասնավորապես, Բելառուսի հետ ապրանքաշրջանառությունը, որի կշիռը ԵԱՏՄ-ում ամենաբարձրն է, նվազել է 7,5 տոկոսով և կազմել 11825,3 միլիոն դոլար: ՌԴ առևտուրը Ղազախստանի հետ կազմել է 5682,8 միլիոն դոլար, ինչը 28,3 տոկոսով պակաս է նախորդ տարվա ցուցանիշից: Ռուսաստանի առևտուրը Ղրղզստանի հետ նվազել է 27,8 տոկոսով և կազմել 540,4 միլիոն դոլար:
Այս վիճակագրությունից հստակ երևում է, որ ԵԱՏՄ ապրանքաշրջանառությունը, թե այլ երկրների հետ, և թե միմյանց միջև տարեց տարի միայն անկում է ապրում և երկու նախագահների տնտեսական աճերի մասին հայտարարությունների կապը իրականության հետ անհասկանալի է:
Տաթևիկ Վարդանյան
«Իրազեկ քաղաքացիների միավորում»
