«Ցանկացած կետի պայմանագրային շեղումը նախատեսում է հետգանձում: Այսինքն ե’ւ գործատուն ե’ւ շահառուն, եթե ընդգրկվում են ծրագրում, նրանք պետք է ի սկզբանե գիտակցեն եւ իրենց վրա պարտավորություն վերցնեն, որ ծրագիրը մինչեւ վերջ տանելու են»,-ասաց աշխատանքի եւ սոցիալական հարցերի նախարարության Զբաղվածության պետական գործակալության պետ Արտակ Մանգասարյանը, որն այսօր «Դիալոգ» մամուլի ակումբում ներկայացրեց, թե գործազուրկներին աջակցելու ինչպիսի պետական ծրագրեր են իրականացվում: Այդ նպատակի համար 2,3 միլիարդ դրամ է նախատեսվել, որի 50 տոկոսից ավելին արդեն ծախսվել է: Ծրագրի շահառու կարող են դառնալ աշխատաշուկայում անմրցունակ անձինք: Առաջնահերթությունը տրվում է ընտանեկան նպաստի համակարգում ընդգրկված, ընտանիքում հաշմանդամություն ունեցող, անչափահասներ ունեցող անձանց, վերադարձած միգրանտներին, ազատազրկման վայրերից վերադարձածներին, փախստականներին, այլ հարկադրական վայրերից վերադարձած անձանց:
Գործակալության պետի տվյալներով, այս տարվա առաջին կիսամյակում գործակալության օգնությամբ աշխատանք է գտել 4 հազար 757 աշխատանք փնտրող: 1398-ը երիտասարդ են, 93-ը` հաշմանդամություն ունեցող անձինք:
Ըստ գործակալության պետի, նախորդ տարվա համեմատությամբ գործազրկության ցուցանիշը 1,1 տոկոսով կրճատվել է: 2015-ին այդ ցուցանիշը 18 % է եղել:
Արտակ Մանգասարյանի խոսքերով, աշխատաշուկայում պահանջարկ ունեն բարձրագույն կրթությամբ մասնագետներ, մասնավորապես` տնտեսագետներ, բժիշկներ, ճարտարագետներ, ծրագրավորողներ, մենեջերներ եւ այլն:
Միջին մասնագիտական կրթությամբ մասնագետներից էլ պահանջված են խոհարարները, հացթուխները, փականագործները, մատուցողները, դերձակները, վարորդները եւ այլն:
Լուսինե ԲՈՒԴԱՂՅԱՆ
