«Օրենսգրքում գրված է՝ կա՛մ մինչեւ սեպտեմբերի 1-ը այդ միջոցները հայթայթում են, եւ ԿԸՀ-ն որոշում է կայացնում այդ ընթացակարգերի վերաբերյալ, եթե ոչ ապա՝ ոչ»,- Aravot.am-ի հետ զրույցում, անդրադառնալով Ընտրական օրենսգրքի վերահսկողական մեխանիզմների տեղադրմանը, ասաց «Իրազեկ քաղաքացիներ» հասարակական կազմակերպության համակարգող Դանիել Իոաննիսյանը:
Նա նշեց, որ թեեւ միջոցները հայթայթվել են, սակայն կան տեխնիկական խնդիրներ ամբողջ բնակչությանը նույնականացման քարտեր բաժանելու հետ. «Ըստ էության, այն լեհական կազմակերպության վրա հղում տալով, որը որ Հայաստանում նույնականացման քարտերն է տպում, իշխանություններն ասում են, որ դա տեխնիկապես անհնար է, այսինքն՝ ֆիզիկապես չեն հասցնի: Հիմա մենք կարող ենք հավատալ իշխանությունների այդ հայտարարությանը, մենք նաեւ կարող ենք ունենալ մեր տեսակետը իրական մոտիվների մասին: Բայց ըստ էության, գրեթե արդեն փաստ է, որ մինչեւ սեպտեմբերի 1-ը ԿԸՀ-ն նման որոշում չի կայացնի եւ այս փոփոխությունները ուժի մեջ չեն մտնի»:
Դանիել Իոաննիսյանը ընդգծեց, որ քաղաքացիական հասարակությունը չի ստորագրել «4+4+4»-ի համաձայնությունը եւ իր դիրքորոշումն է հայտնել դրա վերաբերյալ եւ չի ստորագրել. «Այդ համաձայնությունը, ըստ ամենայնի, տապալվում է»:
Անդրադառնալով կայանալիք Ազգային ժողովի ընտրություններին՝ Դանիել Իոաննիսյանը ասաց, որ դրանք, այնուամենայնիվ, փոփոխություններ կրելու են, բայց ընտրատեղամասերում տեսախցիկներ չեն տեղադրվի, 10 մատով ընտրողների նույնականացման մեխանիզմները չեն լինելու, որն իր կարծիքով կարող էր իրապես դրական փոփոխությունի բերել. «Այս պահին իշխանությունները, միգուցե կառաջարկեն այլ լուծումներ, բայց այն հաղորդագրությունները, որոնք քաղաքացիական հասարակությունը ստանում է իշխանությունից, դեռեւս մեծ հույսեր չեն տալիս»:
Կարդացեք նաև
Ամի ՉԻՉԱԿՅԱՆ
