Այսօր ՀԱՊԿ-ում Հայաստանի նախագահության ներքո ՀԱՊԿ անդամ պետությունների պաշտպանության նախարարների խորհրդի նիստն էր, որի ավարտին ՀՀ պաշտպանության նախարար Սեյրան Օհանյանն ու ՀԱՊԿ գլխավոր քարտուղար Նիկոլայ Բորդյուժան հանդիպեցին լրագրողներին եւ հանդես եկան համատեղ հայտարարությամբ:
Լրագրողներին թույլ չտրվեց որեւէ հարց ուղղել: Նիկոլայ Բորդյուժան ընդհանրապես որեւէ բառ չասաց լրագրողների հետ հանդիպմանը:
Սեյրան Օհանյանն ասաց, որ սա հերթական նիստն էր եւ այս հանդիպումների ձեւաչափը յուրահատուկ հնարավորություն է՝ քննարկելու առկա ակտուալ հարցերը՝ հաշվի առնելով ստեղծված ռազմաքաղաքական իրավիճակը ՀԱՊԿ անդամ պետությունների տարածքներում, այդ թվում՝ կովկասյան տարածաշրջանում եւ ճշգրտելու հետագա աշխատանքը՝ ռազմական համագործակցության զարգացման ուղղությամբ, ինչն էլ իրենք արեցին այս նիստի օրակարգի շրջանակներում:
Կարդացեք նաև
Թե կոնկրետ ինչ հարցեր են քննարկվել՝ Սեյրան Օհանյանն ասաց, որ հարցերի մի մասը կապված էր կոալիցիոն ռազմարդյունաբերության զարգացման ու ռազմատեխնիկական համագործակցության արդյունավետության բարձրացմանը՝ կատարելագործելով ՀԱՊԿ անդամ երկրների զինված ուժերի՝ փոխգործակցությունը եւ ստեղծելով կազմակերպություններ՝ հակաօդային պաշտպանության ոլորտում:
Նախարարը վերջում տեղեկացրեց, որ հաջորդ հերթական նիստը անցկացվելու է այս տարվա հոկտեմբերին Երեւանում:
Հռիփսիմե ՋԵԲԵՋՅԱՆ
