«Միջազգային հումանիտար զարգացման» հասարակական կազմակերպությունն սկսում է ժողովրդական հետաքննություն: Այս մասին օգոստոսի 15-ին «Տեսակետ» մամուլի ակումբում հայտարարեց հասարակական կազմակերպության նախագահ Արման Ղուկասյանը:
«Մենք վստահ ենք, որ «Սասնա ծռերի» պայքարը եղել է անկեղծ, ունեցել է անկեղծ նպատակներ, դրանում ոչ մի կասկած չունենք, բայց տարանջատում ենք փողոցային պայքարը եւ դիտարկում ենք այդ փողոցային պայքարը տարբեր տեսանկյուններից: Առաջին հերթին՝ այն տեսանկյունից, որ մեր կարծիքով՝ այնտեղ կային համակարգողներ, որոնք ի սկզբանե պայքարը փորձում էին տանել այլ ուղղությամբ: Մենք այսօր սկսում ենք ժողովրդական հետաքննություն եւ փորձելու ենք երկու շաբաթվա ընթացքում հավաքել բոլոր փաստերը, թե ինչու ենք մենք այդպես մտածում»,- ասաց նա:
Արման Ղուկասյանը ընդգծեց, թե իրենք գիտեն՝ ինչպես են տեխնոլոգիաները օգտագործվել Ուկրաինայում Մայդանի ժամանակ, Վրաստանում, Թունիսում, Եգիպտոսում. «Հստակ նկատել ենք նմանատիպ տեխնոլոգիաները այս մեկ ամսվա ընթացքում թե՛ սոցիալական ցանցերում, թե՛ փողոցային պայքարի ընթացքում: Մենք չենք նշում, որ փողոցային պայքարի բոլոր համակարգողները անկեղծ նպատակներ են ունեցել կամ չեն ունեցել, ո՛չ, մենք դիտարկում ենք որոշ համակարգողներին»:
Կարդացեք նաև
Ժողովրդական հետաքննության արդյունքները հասարակական կազմակերպության անդամները պատրաստվում են ներկայացնել 2 շաբաթ անց՝ օգոստոսի 30-ին: Արման Ղուկասյանը նշեց, որ իրենք պատրաստվում են ներկայացնել տեխնոլոգիաները, թե ինչ է կատարվել սոցիալական ցանցերում, որ հասարակական կազմակերպություններն են կիրառել այդ տեխնոլոգիաները:
«Մեզ համար անհասկանալի է ԱՄՆ դեսպանատան դիրքորոշումը՝ ինչու է սպառնում մեր ոստիկանությանը: Խոսքը նրա մասին չէ, որ չարաշահումներ չեն եղել, բնականաբար, եղել են չարաշահումները, եւ մենք էլ ենք դեմ չարաշահումներին, բայց դա մեր երկրի ներքին գործն է եւ ոչ ոք արտաքին ուժերից իրավունք չունի խառնվել մեր ներքին գործերին»,- հավելեց Արման Ղուկասյանը:
Ամի ՉԻՉԱԿՅԱՆ
