«Սասնա ծռեր» խմբավորման նկատմամբ հարուցված քրեական գործին միացել են նախկինում հարուցված երկու քրեական գործ: Այս մասին Aravot.am-ին հայտնեց «Սասնա ծռեր» խմբավորման անդամ Վարուժան Ավետիսյանի պաշտպան Մուշեղ Շուշանյանը:
Գործերից առաջինը նախորդ տարի հարուցված քրեական գործն է, որի շրջանակներում զանգվածային անկարգությունների նախապատրաստության հոդվածով մեղադրանք էր առաջադրվել «Հիմնադիր խորհրդարանի» 7 անդամներին: Մյուսը՝ ամիսներ առաջ Ժիրայր Սեֆիլյանի նկատմամբ հարուցված գործն է, որով նրան մեղադրանք է առաջադրվել 235-րդ հոդվածով՝ զենք-զինամթերք կրել, ձեռք բերելը:
«Առաջին գործով մեղադրանք է եղել առաջադրված նաեւ Վարուժան Ավետիսյանին: Հիմա, քանի որ այդ քրեական գործը միացվել է այս քրեական գործին եւ դարձել է մեկ քրեական գործ, նախկինում առաջադրված մեղադրանքը առաջադրվել է նաեւ այս քրեական գործի շրջանակներում: Երեկ Վարուժան Ավետիսյանի մեղադրանքը, որի պաշտպանությունը իրականացնում եմ նաեւ ես, լրացվել է, նոր մեղադրանք է առաջադրվել, որը ներառում է նաեւ նախորդ տարվա քրեական գործը»,- ասաց Մուշեղ Շուշանյանը:
Նման եղանակով լրացվել է նաեւ Պավլիկ Մանուկյանի մեղադրանքը. նա մեղադրվում էր ապօրինի զենք-զինամթերք պահելու եւ տեղափոխելու, շենքեր, շինություններ զավթելու հոդվածներով: Այժմ դրանց է ավելացել նաեւ զանգվածային անկարգություններ նախապատրաստելու հոդվածը:
Կարդացեք նաև
Ամի ՉԻՉԱԿՅԱՆ
