Երեկ Ռուսաստանում տեղի ունեցած Սարգսյան-Պուտին հանդիպման ժամանակ ՀՀ նախագահ Սերժ Սարգսյանն անդրադառնալով ԼՂՀ կարգավորման խնդրին, ասել է՝ «Վլադիմիր Վլադիմիրի, ես ուզում եմ անձնական երախտագիտությունս հայտնել Ձեզ` Լեռնային Ղարաբաղի խնդրի դիվանագիտական ճանապարհով լուծման գործում Ռուսաստանի կողմից ներդրվող ջանքերի համար: Եվ իհարկե, այստեղ շատ եւ շատ կարեւոր է, որպեսզի իրականացվեն ձեռքբերված պայմանավորվածությունները: Մենք պատրաստ ենք դրան»:
Այսօր կառավարության նիստից հետո լրագրողների հետ ճեպազրույցում արտաքին գործերի փոխնախարար Աշոտ Հովակիմյանը պատասխանելով «Ազատություն ռ/կ»-ի այն հարցին, թե ինչ պայմանավորվածությունների մասին է նշել նախագահ Սարգսյանը՝ ասել է.«Խոսքը գնում էր այն պայմանավորվածությունների մասին, որը ձեռք է բերվել Վիեննայի եւ Սանկտ-Պետերբուրգի հանդիպումների ժամանակ: Նախագահը շատ հստակ ասաց, որ խոսքը գնում է 94-95 թվականների եռակողմ այդ անժամկետ զինադադարների պայմանագրի վերաբերյալ: 2-րդը՝ հետաքննությունների մեխանիզմի վերաբերյալ, եւ 3-րդը՝ ԵԱՀԿ գործող նախագահի անձնական ներկայացուցչի թիմի կարողությունների ընդլայնման վերաբերյալ»:
Նելլի ԲԱԲԱՅԱՆ
