«Ես լրագրողների վճռականությանը չեմ կասկածում»,- օգոստոսի 10-ին Ազատության հրապարակում լրագրողների հետ զրույցի ընթացքում ասաց ԱԺ պատգամավոր Նիկոլ Փաշինյանը:
Հիշեցնենք՝ նա եկել էր Ազատության հրապարակ մասնակցելու մի շարք լրատվամիջոցների ղեկավարների կազմակերպած «Հանուն խոսքի ազատության» խորագրով հավաքին:
Նա ընդգծեց, որ ինքը եւս լրագրող է եւ իր հնարավորությունների չափով կաջակցի նախաձեռնությանը. «Հայաստանում պետք է փոփոխություններ լինեն: Սա խոսքի ազատության խնդիր է, բայց խոսքի ազատության խնդիրը այլեւս քաղաքական խնդիր է: Կա քաղաքական խնդրի լուծման բանաձեւ եւ լուծում, կա նաեւ այս խնդրի լուծումը»:
Ոստիկանության լրատվական ծառայության պետ Աշոտ Ահարոնյանը հայտարարել էր. «Ես դեռ չեմ տեսել, ես չեմ բացառում, որ նման տեսանյութեր լինեն, ես ոչինչ չեմ բացառում, քանի որ այս պահին քննություն է ընթանում, բայց այս պահի դրությամբ ես չեմ տեսել ոստիկանության ծառայող քաղաքացիական անձ տեսանյութում, որը բռնություն է կիրառում թե՛ լրագրողի, թե՛ քաղաքացու նկատմամբ»:
Կարդացեք նաև
Անդրադառնալով այս հայտարարությանը՝ Նիկոլ Փաշինյանը ասաց. «Ես ինքս ինչը, որ տեսել եմ, կարող եմ դա ասել, բոլորդ էլ տեսել եք, որ ինչ-որ քաղաքացիական հագուստով անձինք ընդունում են ինչ-որ հաբեր, մտնում են ինչ-որ տեղ, եւ ոստիկանության պետի թիկնազորի քաղաքացիական հագուստով անդամների հրահանգներով կատարվում են ինչ-որ գործողություններ»:
Ամի ՉԻՉԱԿՅԱՆ
