Ազատության հրապարակում օգոստոսի 10-ին լրագրողներն էին՝ «Հանուն խոսքի ազատության» խորագրով հավաքի շրջանակներում: Բողոքի ակցիան նախաձեռնել են լրատվամիջոցների մի խումբ ղեկավարներ՝ ոչ ասելու բռնություններին, դատապարտելու լրագրողների դեմ իրականացվող հարձակումները, պահանջելու անհապաղ պատժել լրագրողների մասնագիտական գործունեությունը խոչընդոտողներին:
Ազատության հրապարակում լրագրողներին աջակցելու էին եկել մի խումբ պատգամավորներ, հասարակական, քաղաքական գործիչներ, այդ թվում նաև պատգամավորներ Էդմոն Մարուքյանը, Նիկոլ Փաշինյանը, Սամվել Ֆարմանյանը, Նաիրա Զոհրաբյանը, Վահե Էնֆիաջյանը, Երեւանի ավագանու «Բարեւ, Երեւան» խմբակցության անդամ Անահիտ Բախշյանը, Ոստիկանության լրատվության եւ հասարակության հետ կապերի բաժնի պետ Աշոտ Ահարոնյանը եւ այլք:
«Մեդիամաքս» մեդիա ընկերության գլխավոր խմբագիր Դավիթ Ալավերդյանը
Ազատության հրապարակում «Մեդիամաքս» մեդիա ընկերության գլխավոր խմբագիր Դավիթ Ալավերդյանը ընթերցեց նախապես տարածված հայտարարությունը, այնուհետեւ ներկաները հնարավորություն ունեցան իրենց ստորագրությամբ միանալու դրան:
Կարդացեք նաև
«Ժողովուրդ» օրաթերթի գլխավոր խմբագիր Թագուհի Թովմասյանը
«Ժողովուրդ» օրաթերթի գլխավոր խմբագիր Թագուհի Թովմասյանը Aravot.am-ին հայտնեց, որ ստորագրահավաքին է միացել 114 քաղաքացի: Նրա խոսքերով՝ ստորագրահավաքը սիմվոլիկ բնույթ էր կրում. «Մեր ակցիան ուներ նախազգուշացման նպատակ, որպեսզի մենք իշխանություններին ցույց տանք, որ մենք կարող են ցանկացած պահի համախմբվել՝ մի կողմ դնելով մեր ունեցած դիրքորոշումները ամենատարբեր հարցերի շուրջ: Մենք այսօր կարող ենք արձանագրել, որ այսօր Հայաստանում կա իսկապես մեծ համախմբում:
Ես այսօր այստեղ տեսա իմ գործընկերներին, որոնք հանգստի էին գնացել՝ մեկնել էին քաղաքից դուրս, բայց եկել էին, մասնակցում էին ստորագրահավաքին՝ կարեւորելով այն: Այս ակցիայից հետո մենք, ըստ էության, իշխանություններին երկու ամիս ժամանակ ենք տալիս, եթե երկու ամիսների ընթացքում չեն լինում ակնկալվող պատիժները, մենք կդիմենք առավել կոշտ մեթոդների՝ ընդհուպ մինչեւ միջազգային հանրությանը կդիմենք, տարբեր ակցիաներ կիրականացնենք: Այսինքն՝ մենք պետք է ցույց տանք, որ լրագրողի վրա ձեռք բարձրացնողը անհապաղ պետք է պատասխանատվություն կրի»:
Ամի ՉԻՉԱԿՅԱՆ
