ՀՀ ՊՆ վարչական համալիրում օգոստոսի 10-ին հյուրընկալվել են ապրիլյան մարտական գործողություններին մասնակցած կամավորական ջոկատների հրամանատարներն և մի շարք մարտիկները:
Ողջունելով հյուրերին, իր խոսքում ՀՀ պաշտպանության նախարար Սեյրան Օհանյանը շեշտել է, որ հայ ժողովուրդը վտանգի պահին միշտ միասնական է վտանգներին դիմագրավելու համար: «Մեր նորօրյա պատմության ընթացքում կարողացել ենք ստեղծել պետություն, բանակ, անվտանգային համակարգ և տանել նրան, որ հայկական բանակը դառնա անվտանգության ապահովման առանցքը և նրա շուրջը մենք բոլորս համախմբվենք: Ապրիլի սկզբին ԼՂՀ-ի դեմ սանձազերծված գործողությունների չեզոքացումն էլ վկայությունն է նրա, որ պաշտպանության բանակն իր առջև դրված խնդիրները կատարում է: Բայց երբ բանակը համալրվում է նաև մարտական ընկերներով, կամավորականներով, այն ավելի ամուր, ավելի հզոր է դառնում և ավելի մեծ հենք է ստեղծում ապագա անվտանգային համակարգը ձևավորելու համար»,- ասել է Սեյրան Օհանյանը:
Մարտական գործողություններին մասնակցած կամավորականներն էլ իրենց խոսքում նշել են, որ ապրիլյան գործողությունների և իրավիճակի կայունացման օրերին ունեցել են նույն զգացողություններն ու ապրումները, ինչ Արցախյան հերոսամարտի օրերին, սակայն դիրքերում փաստել են, որ իրենցից ավելի հզոր և մարտական առավել բարձր ոգի ունեցողներ էլ կան. նրանք այսօր դիրքերում կանգնած պաշտպանության բանակի զինվորներն են: Կամավորականները շեշտել են, որ այդ փաստն իրենց ոչ թե մտահոգել կամ հիասաթափեցրել է, այլ, ընդհակառակը, ոգևորել է, որ այսօրվա սերունդն ավելի ամուր է կառչած իր հողին և պատրաստ է կյանքի գնով էլ պաշտպանել հայրենիքը:
Հանդիպման ավարտին Սեյրան Օհանյանը ԼՂՀ ժողովրդի անվտանգության ապահովման գործում ներդրած ավանդի համար մի քանի տասնյակ կամավորականների հանձնել է գերատեսչական մեդալներ:
Կարդացեք նաև
ՀՀ Պաշտպանության նախարարություն
