Գերմանաբնակ բարիտոն Գուրգեն Բավեյանի դիտարկումները
Գերմանաբնակ օպերային երգիչ, բարիտոն Գուրգեն Բավեյանը, որը Ֆրանկֆուրտի օպերային թատրոնի մեներգիչների կազմը համալրել է 2014թ., հաճախ է հրավիրվում Հայաստան: Երբեմն ոմանց մոտ տպավորություն է ստեղծվում, թե արվեստագետը չի էլ բացակայում հայրենիքից:
Դեռեւս Երեւանի Կոմիտասի անվան պետական կոնսերվատորիայում պրոֆեսոր Վալերի Հարությունյանի դասարանում ուսանելու տարիներից, մասնավորապես՝ 2005 թ.-ից նա գլխավոր դերերգերով հանդես է եկել Ղ. Սարյանի օպերային ստուդիայում, օրինակ, մարմնավորել է Մարկոյի կերպարը՝ Պուչինիի «Ջանի Սկիկկի» օպերայում, Բելկորե եւ Էնրիկո՝ Դոնիձետտիի «Սիրո ըմպելիք» եւ «Լյուչիա դի Լամերմուր», Ֆիորելլո՝ Ռոսինիի «Սեւիլյան սափրիչում» եւ այլն, իսկ 2010թ. արժանացել է ՀՀ նախագահի երիտասարդական մրցանակի:
2008-ից՝ մինչ Գերմանիա մեկնելը, Ազգային օպերային թատրոնում հանդես է եկել Ալ. Հարությունյանի «Սայաթ-Նովա» (աշուղ), Բիզեի «Կարմեն» (Մորալեզ), Տիգրանյանի «Դավիթ-Բեկ» (ռուս դեսպան), վերջին երկու տարիներն էլ հրավիրվել է մասնակցելու Շուշիում ավանդական դարձած օպերային ներկայացումներին՝ Տերտերյան «Կրակե օղակ» (տղա), Անդրեյ Բաբաեւ «Արծվաբերդ» (Ռուբեն):
«Առավոտի» հետ զրույցում Գուրգեն Բավեյանը հիշեցրեց, որ քանիցս հրավիրված է եղել Հայաստանի ազգային ֆիլհարմոնիկ նվագախմբի գեղարվեստական ղեկավար եւ գլխավոր դիրիժոր Էդուարդ Թոփչյանի կողմից եւ մաս կազմել Ֆիլհարմոնիկի օպերային նախագծերին՝ Լեոնկավալլո «Պայացներ»,Պուչինի «Տուրանդոտ» եւ «Բոհեմ», ինչպես նաեւ Հայաստանի պետական երիտասարդական նվագախմբի, Մենակատարների պետական անսամբլի եւ այլ կոլեկտիվների հետ:
Հետաքրքրվեցինք՝ ինչը ստիպեց արդեն կոնսերվատորիական տարիներից ճանաչում ձեռք բերած բարիտոնին՝ թողնել Հայաստանը, Գուրգեն Բավեյանը պատասխանեց. «Նախ ասեմ, որ դրսում ստեղծագործող որեւէ այլ արվեստագետ այսքան հաճախ հանդես չի գալիս Հայաստանում: Ես այս տարվանից ազատ արվեստագետի կարգավիճակում եմ, թեեւ կապս լիովին խզված չէ Ֆրանկֆուրտի օպերային թատրոնի հետ: Դա թույլ է տալիս ազատ արվեստագետի կարգավիճակով հյուրախաղերի մեկնել այլ երկրներ, եւ ցանկացած առիթով կամ հրավերի դեպքում հանդես գալ Հայաստանում: Ինչ վերաբերում է հայրենիքից հեռու ստեղծագործելուն, նշեմ, որ 2013 թ. մեկնել եմ Ֆրանկֆուրտի երաժշտական բարձրագույն ակադեմիայի մագիստրատուրայում ուսումս շարունակելու՝ անվանի մանկավարժ Հեդվիգ Ֆասբենդերի ղեկավարությամբ»:
Զրույցի ընթացքում անդրադարձ եղավ Ֆրանկֆուրտի օպերային թատրոնի իր դերերգերին: Գուրգեն Բավեյանը նշեց, որ 2014-16 թթ. հանդես է եկել շուրջ 7 բեմադրությունների գլխավոր դերերգերով, այդ թվում՝ Վերդիի «Օթելլոյում», Լեհարի «Կոմս Լյուքսեմբուրգում», Պուչինիի «Բոհեմում», «Ջանի Սկիկկիում», Մոցարտի «Ֆիգարոյի ամուսնությունում» եւ այլն: Նա հանդես է եկել նաեւ ժամանակակից բեմադրություններում, օրինակ՝ հրեա կոմպոզիտոր Լիոր Նավոկի «Մեր գետի ափին» օպերայում: Այս առիթով բարիտոնը հայտնեց, որ օպերայի լիբրետոյի հիմքում իսրայելա-պաղեստինյան կոնֆլիկտն է, ու լավ կլիներ, որ հայ ժամանակակից կոմպոզիտորներն էլ օպերաներ գրեին Ղարաբաղյան հիմնահարցի թեմայով:
Պարզեցինք, որ մեր զրուցակիցը շուտով կմեկնի Ֆրանկֆուրտ՝ նախ մասնակցելու առաջիկայում մեկնարկող Rheingau Musik Festival-ին, ապա Ֆրանկֆուրտի թատրոնի հետ կմեկնի հյուրախաղերի Բարսելոնայի «Լիցեյ», Հոլանդիայի «Մաստրիխտ» թատրոններ, Իտալիայի Պեզարո քաղաքում ավանդաբար անցկացվող Ռոսինիի անվան փառատոն եւ այլն:
ՍԱՄՎԵԼ ԴԱՆԻԵԼՅԱՆ
Լուսանկարներում` Գուրգեն Բավեյանը՝ «Ջանի Սկիկկի», «Ֆիգարոյի ամուսնությունը» օպերաներում եւ Ֆրանկֆուրտի՝ Թանգարանների նվագախմբի
հետ ելույթի ժամանակ:
«Առավոտ»
09.08.2016
