Առաջին օգնություն երեխաներին.
հանկարծահաս հիվանդագին վիճակներ
Հանկարծահաս հիվանդագին վիճակները զարգանում են անսպասելի, ուստի եւ հաճախ դժվար է լինում հասկանալ դրանց պատճառը եւ ճիշտ կողմնորոշվել: Երեխաների մոտ հաճախ հանդիպող հանկարծահաս հիվանդագին վիճակներից են ցնցումային նոպան եւ սուր որովայնը: Այդպիսի դեպքերում պետք չէ խուճապի մատնվել, անհրաժեշտ է սառնասրտություն հանդես բերել, գործել հանգիստ եւ գնահատելով իրավիճակը` ըստ անհրաժեշտության` ահազանգել շտապօգնություն կամ դիմել բժշկի: Ամեն դեպքում՝ հիշեք, որ դուք չեք կարող փոխարինել մասնագիտական բժշկական օգնությանը:
Ցնցումային նոպաներ
Վնասվածքների, տարբեր հիվանդությունների, տենդի, վարակի, թույների ազդեցության հետեւանքով երեխաները կարող են ցնցումային նոպաներ ունենալ: Դրանք ավելի հաճախ զարգանում են մարմնի ջերմաստիճանի բարձրացման հետեւանքով:
Նոպայի ժամանակ ցուցաբերվող առաջին օգնությունը մեծ դժվարություն չի ներկայացնում, թեեւ ծնողները սովորաբար ահաբեկվում են` երեխային անսպասելիորեն այդ վիճակում տեսնելով: Պետք չէ մեղադրել երեխային: Հիշեք, որ ո՛չ երեխան, ո՛չ դուք չեք կարող կառավարել նոպան:
Ի՞նչ անել
– Մի՛ փորձեք դադարեցնել նոպան: Մի՛ բռնեք երեխային, քանի որ այդ անօգուտ քայլը կարող է միայն լրացուցիչ վնասվածքների պատճառ դառնալ:
– Հեռացրեք մոտակա առարկաները: Պաշտպանեք երեխայի գլուխը՝ նրա տակ դնելով բարակ բարձ կամ ծալած հագուստ:
– Մի՛ փորձեք ինչ-որ բան տեղադրել ծնոտների միջեւ:
– Նոպայից հետո երեխան սովորաբար քնկոտ եւ ապակողմնորոշված է լինում: Ցնցումների ավարտից հետո պառկեցրեք նրան կողքի վրա, որպեսզի բերանի խոռոչում կուտակված հեղուկները` թուքը, արյունը, փսխման զանգվածները, կարողանան արտահոսել:
– Հանգստացրեք երեխային: Մնացեք նրա կողքին, մինչեւ գիտակցությունը լրիվ վերականգնվի:
– Ահազանգեք շտապօգնություն:
Տենդային ցնցումներ
Եթե ցնցումների պատճառը երեխայի բարձր ջերմությունն է, բացի վերը նշված քայլերից, անհրաժեշտ է ձեռնարկել նաեւ միջոցներ` մարմնի ջերմությունը իջեցնելու ուղղությամբ, սակայն պետք է խուսափել երեխային գերսառեցնելուց:
– Թեթեւացրեք երեխայի հագուստը, ապահովեք մաքուր օդի անհրաժեշտ քանակություն:
– Երեխային շփեք գոլ ջրով թրջված սպունգով` շարժվելով գլխից դեպի ոտքեր:
– Տվեք երեխային ջերմիջեցնող դեղամիջոց (պարացետամոլի հաբեր, մոմիկներ կամ օշարակներ):
Նյութը` ըստ doctors.am-ի
«Առավոտ»
09.08.2016
