Ազատության հրապարակում այսօր էլ հանրահավաքը սկսվեց նույն ժամին` փոքրաթիվ քաղաքացիների մասնակցությամբ:
«Ղարաբաղ կոմիտեի» անդամ Աշոտ Մանուչարյանը կրկին ելույթ ունեցավ. Այս անգամ փորձում էր վերլուծել Սահմանադրությունն ըստ գլուխների:
Առաջին գլխի հիմքը պայմանականորեն, ըստ նրա, մարդն է. «Գալիս են հատուկ ջոկատայինները, «Սասնա ծռեր» խմբի տղաները զենքը վայր են դնում, հատուկ ջոկատայիններից մեկի կողքով, երբ անցնում է խմբի ամենատարեց ազատամարտիկը՝ Դեդը, պտտվում ու հարցնում է՝ բալա երեւանցի՞ ես, այո՛, պապի, պատասխանում է հատուկ ջոկատայինը: Թվում է, թե մանրուք բան է, բայց նայեք այսօրվա աշխարհի չափանիշներով:
Տեռորիստը դիմում է հատուկ ջոկատայինին, բալա է ասում, իսկ հատուկ ջոկատայինը պատասխանում է՝ պապի, երկուսն էլ կեցցեն, երկուսն էլ ծնեցին այն, ինչ կոչվում է հայ մարդ»:
Կարդացեք նաև
Պարոն Մանուչարյանը հիացած մի այլ դեպք էլ պատմեց, երբ, ըստ նրա, հատուկ ջոկատայինը մոտենում է «Միայնակ գայլին» ու ասում՝ ամբողջ կյանքը երազել է նրա ձեռքը սեղմել. «Սեղմում է հանցագործի ձեռքը, որովհետեւ նա հանցագործ չէ, այլ՝ հայ մարդ է»:
Ըստ նրա, ՀՀ Սահմանադրությունը չի կարող գրվել արտասահմանում, գրասենյակներում, օտարերկրացիների կողմից, այն կարող է գրել միայն հայ ժողովուրդը, որովհետեւ. «Մենք ծուռ ենք, «Սասնա ծռեր ենք»:
Ըստ նրա, Սահմանադրության երկրորդ գլխի հիմքում մեր թշնամին է. «Մենք ունենք այս աշխարհում մի թշնամի. «Սասնա ծռերը» կարդացեք ու կգտնեք այդ թշնամուն, դա մանրիկ մարդն է, այն մարդը, որի փոքր եսը կառավարում է իր կյանքը»:
Պարոն Մանուչարյանի խոսքով, չպետք է թույլ տալ, որ քաղաքական գործիչները կառավարվեն ու տարվեն իրենց եսով, նա նաեւ կոչ արեց հավաքվածներին՝ հենց այսօրվանից ուրիշ ձեւով կազմակերպել իրենց կյանքը, հիանալ միմյանցով եւ չկենտրոնանալ միմյանց թերությունների վրա:
Արփինե ՍԻՄՈՆՅԱՆ
Ան որ ինքզինք «Սասնա Ծռերի» հետ կը նոյնացնէ համարում է ուրեմն թէ ինք դիւզազներգական հերոս մըն է: Կիսաստված մը:
Սա որքա՜ն համեստութիւն…
(Ասի ըսած, եկէք մի հատ ել յիշենք թէ այժմ որոնց ձեռքն է գտնվում Սասունը… Եթէ մի քիչ նվազ «ծուռութիւն» ընէինք հատկապէս այդտեղ, եւ մի քիչ աւելի խելք գործածէինք, թերեւս տարբեր կ’ըլլար այժմ այդ կացութիւնը եւս… )