Ինչպես արդեն տեղեկացրել էինք, մի խումբ քաղաքացիներ «Էրեբունի» բժշկական կենտրոնի դիմաց էին հավաքվել: Նրանք պահանջում էին տեղեկատվություն տալ բժշկական կենտրոնում բուժում ստացող «Սասնա ծռեր» խմբավորման անդամների մասին:
Շուտով նրանց մոտեցավ «Էրեբունի» ԲԿ-ի գործադիր տնօրեն Միքայել Մանուկյանը. «Բոլորի առողջական վիճակը դրական տենդենցով է գնահատվում: Երկու հոգու՝ Թաթուլ Թամրազյանին եւ Արմեն Լամբարյանին, այսօր առավոտյան ուղարկել ենք հիվանդասենյակ, եւ իրենց վիճակը բավարար է գնահատվում: Սեդրակ Նազարյանը դեռեւս կմնա վերակենդանացման բաժանմունքում, բայց այսօր իր վիճակն ավելի լավ էր, քան երեկ: Օրեցօր վիճակի մեջ մենք դրական միտումներ ենք տեսնում, ինքը համապատասխան դեղորայք է ստանում, բժիշկները խնամում են, վերքերը նորմալ ընթացքով լավանում են»:
Միքայել Մանուկյանը ասաց, որ դեռեւս շուտ է հետեւանքների մասին խոսելը, բայց վստահություն հայտնեց, որ բուժումը լիարժեք է լինելու եւ որեւէ մեկի մոտ հետեւանք չի լինելու: Քաղաքացիները հետաքրքրվեցին՝ արդյո՞ք հաշմանդամություն ունենալու են, Միքայել Մանուկյանը պատասխանեց՝ ոչ, հաշմանդամության խնդիր չի լինելու. «Ուղղակի խնդիրն այն է, որ դեռեւս շուտ է այդ հարցին պատասխանել: Մենք անցել ենք ամենածանր փուլը, եւ փառք աստծո, բարեհաջող ենք անցել: Մնում է արդեն վերականգնողական եւ մնացած փուլերը, որոնք արդեն սկսել ենք կազմակերպել»:
Քաղաքացիները հետաքրքրվեցին նաեւ Արմեն Լամբարյանի վիճակի մաստին, Միքայել Մանուկյանը պատասխանեց, որ վերքի վիճակը դրական է, նյարդերը վնասված չեն. «Ժամանակ է պետք, որ վերքը լավանա. մեկ շաբաթում չի լավանում, բայց միտումը շատ լավն է: Ինքն արդեն հիվանդասենյակում է, դա արդեն հաղթանակ է»:
Կարդացեք նաև
Անդրադառնալով Թաթուլ Թամրազյանին՝ Միքայել Մանուկյանը ասաց. «Թաթուլի մոտ կար երիկամի վնասում եւ հաստ աղիքի վնասում: Երիկամը հեռացվել է, հաստ աղիքը դուրս է բերվել դուրս, մոտ վեց ամիս հետո պետք է կրկնակի վիրահատություն կատարվի, ոչ շուտ: Ինքը քայլում է, սնվում է, գիրք է կարդում, ոչ մի դեղ չի ստանում»:
Իսկ Սեդրակ Նազարյանի վիճակը, ըստ նրա, լավ է գնահատվում, գիտակցության մեջ է. «Ինքը դեռեւս գտնվում է վերակենդանացման բաժանմունքում, բայց մի քանի օր հետո նույնպես տեղափոխվելու է հիվանդասենյակ»:
Ամի ՉԻՉԱԿՅԱՆ
