ՀՀ փաստաբանների պալատի անդամ Լիանա Գրիգորյանը հանցագործության մասին հաղորդմամբ դիմել է Հատուկ քննչական ծառայությանը:
Այս տարվա մայիսի 31-ին նրա պաշտպանյալը՝ Մարտին Շաքրյանը, Լոռու մարզի ընդհանուր իրավասության դատարանի դատավճռով դատապարտվել է 2 տարի 6 ամիս ժամկետով ազատազրկման:
Դատավճիռը փոստային առաքման միջոցով Մ. Շաքրյանը ստացել է հունիսի 8-ին, որը բողոքարկվել է մեկ ամիս հետո:
Ըստ Լ. Գրիգորյանի՝ Լոռու մարզի ընդհանուր իրավասության դատարանի դատավճռի կատարումն ապահովելու համար ՀՀ ոստիկանության Արարատի մարզային վարչության Մասիսի բաժին է ուղարկվում կարգադրությունը, սակայն հետագայում պարզվում է, որ դատավճռից տեղյակ չէին:
Կարդացեք նաև
Վերաքննիչ քրեական դատարանը հունիսի 12-ին գրություն է ուղարկում նշյալ բաժնի պետին՝ Ս. Մարտիրոսյանին:
Փաստաբանն ասում է, որ տեղեկացվում է ոստիկանապետին վերաքննիչում առկա բողոքարկման եւ բողոքի մասին, ինչը նշանակում էր, որ դատավճիռը չպիտի կատարվեր, քանի որ այն օրինական ուժի մեջ չէր մտել, մարդը չէր օգտվել իր պաշտպանության իրավունքից, երկրորդ դատական ատյան դիմելուց:
Հետեւանքը լինում է այն, որ հուլիսի 26-ին Մարտին Շաքրյանի վերաբերյալ դատավճիռը ի կատար է ածվում:
Ավելի ծիծաղելին պատճառաբանությունն է՝ չեն նկատել երկրորդ գրությունը, այն է՝ վերաքննիչ քրեական դատարանից ուղարկված:
Մարտին Շաքրյանը հայտնվում է արդարադատության նախարարության «Նուբարաշեն» քրեակատարողական հիմնարկում, եւ որեւէ քայլ չի արվել նրան ազատ արձակելու ուղղությամբ:
Փաստաբանը մեզ հետ զրույցի ժամանակ ասաց, որ պատկան մարմինները մեկը-մեկի վրա են բարդում՝ ցուցաբերելով հանցավոր անգործություն: Նշենք նաեւ, որ Մ. Շաքրյանի նկատմամբ ընտրված է եղել խափանման միջոց ստորագրություն չհեռանալու մասին:
Ռ. ՄԻՆԱՍՅԱՆ
«Առավոտ» օրաթերթ
