Փոխզիջման հասնել, նշանակում է տարածքային ամբողջականության ու ինքնորոշման սկզբունքների միջև օպտիմալ հավասարակշռություն գտնել, Բաքու կատարելիք այցի նախօրեին ադրբեջանական Azertaj-ին տված հարցազրույցում, ըստ «Ազատություն» ռադիոկայանի՝ ասել է Ռուսաստանի նախագահ Վլադիմիր Պուտինը՝ անդրադառնալով ղարաբաղյան հիմնախնդրին։
«Կարգավորման վերջնական նպատակը պետք է լինի համաձայնություն, որի արդյունքում կողմերից և ոչ մեկը իրեն չի զգա հաղթող կամ պարտվող, զիջումները փոխադարձ պետք է լինեն, իսկ կողմերի օգուտները պետք է հասկանալի, ընկալելի լինեն և՛ Ադրբեջանի, և՛ Հայաստանի հանրությանը», – ասել է Պուտինը։
Ռուսաստանի ղեկավարի խոսքով՝ Մոսկվայում գիտակցում են պատասխանատվության այն չափը, որ ընկած է Ադրբեջանի և Հայաստանի նախագահների ուսերին և ողջունում են կառուցողական մոտեցումը, որն առկա էր հունիսի 30-ին Սանկտ Պետերբուրգում կայացած նախագահների վերջին հանդիպման ընթացքում։
Հարցազրույցում Պուտինը կրկնել է պաշտոնական Մոսկվայի բազմիցս արած հայտարարությունն այն մասին, որ Մոսկվան ամենևին չի փորձում Հայաստանին ու Ադրբեջանին պարտադրել (ղարաբաղյան խնդրի կարգավորման) ինչ-ինչ պատրաստի բաղադրատոմսեր: «Կողմերն իրենք պետք է հանգեն պայմանավորվածության՝ առանց արտաքին ճնշման, գտնեն փոխընդունելի որոշումներ», – ասել է Ռուսաստանի առաջնորդը:
Կարդացեք նաև
Մոսկվան, Պուտինի փոխանցմամբ, պատրաստ է այդ պայմանավորվածության երաշխավորը լինել՝ Մինսկի խմբի մյուս համանախագահ պետությունների հետ միասին։
