«Կարող է կապ չունենա Գեւորգ Կոստանյանի հրաժարականը «Սասնա ծռերի» հետ: Կարելի է ենթադրել, որ դատախազը դեմ է խիստ պատժի, կարող է հակառակն է, ինքը ավելի խիստ պատիժ է առաջարկում, քան իշխանությունները, կարող է ինքը իրոք հիվանդ է : Տրամաբանության մեջ կա հետեւյալ բանը՝ եթե «Սասնա ծռերից» հետո է եղել, չի նշանակում՝ դրա պատճառով է եղել»,- այսօր «Հայելի» ակումբում հրավիրած ասուլիսում գլխավոր դատախազի հրաժարականի պատճառների հետ կապված իր տրամաբանությունը ներկայացրեց սոցիոլոգ Ահարոն Ադիբեկյանը:
ԱԱԾ պետի նախկին տեղակալ Գուրգեն Եղիազարյանը չհամաձայնեց: Նա ասաց. «Դատախազի մասին լավ կարծիքի չեմ եղել, բայց այսօր թող ինքը ինձ ների: Իր հրաժարականը ուղիղ կապ ունի «Սասնա ծռեր» խմբի հետ: Ամենաարդար սոցիոլոգն էլ, որ մեջքին ձեռք տաս, տեսնես թեւեր է աճել, որ գա այսօր ինձ ասի՝ դատախազը հիվանդացավ էս երկու օրը, դրա համար վերցրեց ու գնաց, ես գիտեմ, որ էս երկրում մինչեւ գլխին զենք չեն դնում, չի գրում ու գնում»:
Գուրգեն Եղիազարյանն ունի իր վարկածը, թե ինչու այսպես հրաժարական տվեց Գեւորգ Կոստանյանը. «Ազգային անվտանգությունը տվել է գրություն, որ դա ահաբեկչություն է, դատախազն ասել է՝ չեմ կարող որակել ահաբեկչություն»:
Հռիփսիմե ՋԵԲԵՋՅԱՆ
