«Ազատամարտիկների և զորացրված զինծառայողների իրավունքների պաշպանություն» ՀԿ-ի նախագահ Ռազմիկ Ռուշանյանը, «Նոյյան տապան» մամուլի սրահում լրագրողների հետ հանդիպմանը հղում կատարելով ՀՀ օրենքին` նշեց, որ օրենքը բնակարանային ապահովման մասին «խոսում է» ներկա ժամանակով:
Նա մանրամասնեց, թե արդեն անցել է չորս տարի իրենց բարձրաձայնումից, սակայն ոչ մի առաջընթաց. «Երբ զինծառայողներն անցնում են թոշակի, նրանց հիմնական խնդիրներից մեկը բնակարանային ապահովման հարցն է: Այս հարցով բազմիցս դիմել եմ ՊՆ-ին, սակայն պատասխանել են, որ երբ գա ծրագրերի իրագործման ժամանակը, այդ դեպքում ըստ հերթի` կստանան բնակարան: Մինչդեռ ցանկացած կիրթ մարդ գիտի, որ «ապահովվում է» բառը, որը ամրագրված է օրենքում, ներկա ժամանակով է: Ուստի ՊՆ-ն ոչ թե պետք է ասի, թե ինչ-որ ծրագրեր պետք է տարիներ հետո մշակի, այլ այժմ ապահովի բնակարանով: Օրենքը խոսում է ներկա ժամանակով: Մարդիկ հերթագրված են բնակարանի համար, պաշտպանության նախարարություն, բարի եղիր հաջորդ տարվա ֆինանսական բյուջեում մտցնել կետ բնակարանային ապահովման համար»:
Նա նաև մտահոգություն հայտնեց, որ Արցախից զինվորականների հոսք է նկատվում դեպի Հայաստան, ինչը ևս բարդացնում է տեղի զինծառայողների սոցիալական խնդիրների լուծումը. «Արցախցին, որ նշանակում է ստանում ՀՀ մարզերում, տեղափոխվելով Հայաստան` իր հետ բերում է իր ողջ ազգուտակը: Սրա պատճառով դատարկվում է ԼՂՀ-ն, այստեղ այդ անձին ապահովում են բնակարանով, ինչի պատճառով շատ տեղացիներ մնում են առանց բնակարան»:
Պարոն Ռուշանյանը զգուշացրեց, որ դեռ իրավական ճանապարհով են գնում, բայց եթե չստացվեց, գուցե այլ մեթոդների էլ դիմեն:
Կարդացեք նաև
Անդրադառնալով Վլադիմիր Ժիրինովսկիի` «Թքած Հայաստանի վրա…» արտահայտությանը, պարոն Ռուշանյանը նեղսրտեց. «Չեմ հասկանում` մեր իշխանավորները չունե՞ն ազգային ինքնասիրություն: Ուրիշ երկրի հասցեին, եթե նման արտահայտություն արվեր, ԱԳՆ-ի կողմից երեք-չորս ժամվա ընթացքում կլիներ արձագանք»:
Պարոն Ռուշանյանը չի կարծում, թե ճիշտ է Ժիրինովսկիին արհամարհելը. «Պուտինի գործողությունների հետագա քայլերն են նրա հայտարարությունները որոշում: Այդ հայտարարություններից հետո երկրի ռեակցիայից որոշում են` արժե՞ տանել այդ գործընթացն առաջ, թե`ոչ»:
Տաթև ՀԱՐՈՒԹՅՈՒՆՅԱՆ
Լուսանկարը` «Նոյյան տապան»-ի
