ԱԺ պատգամավոր Նիկոլ Փաշինյանը «Ֆեյսբուք» սոցիալական ցանցի իր էջում ուղիղ հեռարձակմամբ էր միացել: Մոտ մեկ ու կես ժամ տեւած ուղիղ հեռարձակման ընթացքում պատգամավորը պատասխանեց իրեն ուղղված հարցերի մի մասին:
Հարցերից մեկը վերաբերում էր Սերժ Սարգսյանի համազգային կառավարություն ստեղծելու մտադրության մասին: Նիկոլ Փաշինյանն ասաց, որ այդ հայտարարությունը բոլորը չէ, որ ուշադիր ընթերցել են. «Իմ տպավորությամբ՝ Սերժ Սարգսյանը, խոսելով համազգային վստահության կամ համաձայնության կառավարության մասին, խոսում էր սահմանադրական փոփոխությունների արդյունքում բերված հնարավորությունների մասին: Ինքն այդքան ասում էր՝ համաձայնության կառավարություն, վստահության կառավարություն, վստահության իշխանություն, մենք դեկտեմբերին Սահմանադրությունը փոխել ենք եւ այդ փոփոխությունների արդյունքում մենք կունենանք վստահության իշխանություն, համաձայնության կառավարություն, եւ իմ տպավորությամբ, ինքը նկատի ուներ հերթական խորհրդարանական ընտրությունները:
Եվ իհարկե՛, իրեն հատուկ ոճով այդ հայտարարությունն անում էր այնպես, որ, այնուամենայնիվ, իրադարձությունները կարող են զարգանալ այնպես, որ անհրաժեշտ լինի զոհաբերել Հովիկ Աբրահամյանի կառավարությունը կամ, համենայնդեպս, ինքը այդ հայտարարությունը ուզում էր անել այնպես, որ Հովիկ Աբրահամյանը եւ իր կառավարությունը լիարժեք վստահ չլինեն, որ իրենց տեղն ու դիրքը ապահովված է: Այսինքն՝ իմ կարծիքով՝ այդ հայտարարությունը որոշակի շփոթ առաջացնելու նպատակ ուներ»:
Նիկոլ Փաշինյանը նշեց, որ չի կարծում, որ Սերժ Սարգսյանն առաջիկայում մտադրություն ունի ստեղծել նոր կառավարություն, եթե արտառոց ներքաղաքական կամ աշխարհաքաղաքական կոնյունկտուրան չփոխվի. «Այդ ելույթում ակնհայտ է, որ խոսում է՝ մինչեւ հերթական ընտրություններ, որոնք, ինչպես հայտնի է, տեղի են ունենալու մի քանի ամիս անց, ինքը չի պատրաստվում որեւէ փոփոխություն անել կոնկրետ կառավարության կազմում: Սերժ Սարգսյանի օգտագործած համաձայնություն, վստահություն տերմիններին ես կվերաբերվեի նույնպիսի լրջությամբ, ինչպիսի լրջությամբ մենք վերաբերվում ենք Սերժ Սարգսյանի հայտարարություններին կոռուպցիայի դեմ պայքարի վերաբերյալ»:
Կարդացեք նաև
Ամի ՉԻՉԱԿՅԱՆ
