«Ընդդեմ իրավական կամայականության» հ/կ տնօրեն , ՀՀ մարդու իրավունքների նախկին պաշտպան Լարիսա Ալավերդյանը վստահ է, որ բախումնային սցենարները արդյունավետ չեն, այլ հակառակը, դրանից հետո գալիս են ռեպրեսիաները:
«Հայելի» ակումբում լրագրողների հետ հանդիպմանը տիկին Ալավերդյանը, խոսելով «Սասնա ծռեր» խմբի գործողություններից, հայտարարեց, թե իր համար անընդունելի է տղաներին «ահաբեկիչ» պիտակավորելը ու պատահական չէ, որ միջազգային կազմակերպություններն այդ եզրույթը չօգտագործեցին:
Լարիսա Ալավերդյանի կարծիքով` «Սասնա ծռեր» խմբի անդամների` զենքը վայր դնելու որոշմամբ առաջացած խնդիրներին լուծում չտրվեց. «Համաձայն չեմ այն հայտարարություններին, թե այս արարքում զղջում կա: Խմբի անդամները պարզ արտահայտվել են, որ իրենք համարում են այս փուլում իրենց առաքելությունն ավարտված»:
ԳԽ պատգամավոր Ազատ Արշակյանը չի արդարացնում «Սասնա ծռեր» խմբի անդամների` ՊՊԾ գնդի գրոհը: Նա հայտարարեց. «Գրոհ է եղել Հայաստանի վրա, գրավվել է զորամաս, կարևոր չէ` ովքեր են եղել: Կարգալուծված եմ համարում իմ հայրենիքի անվտանգությունը: Չպետք է գրավվի Հայաստանի որևէ խրամատ ու զորամաս»:
Կարդացեք նաև
Ազատ Արշակյանը հարց բարձրացրեց` արդյոք զինված խումբը `այդ հարձակմամբ հասա՞վ իր նպատակին:
Դառնալով ՀՀ նախագահ Սերժ Սարգսյանի հայտարարությանը` տիկին Ալավերդյանը նշեց. «Գործող նախագահի խոսքն ամբողջական չէր. նա տարբերակեց ոստիկանության կողմից գործած անթիվ- անհամար հանցագործությունները այն բռնությամբ տեղի ունեցած այն գործողություններից, որոնք անպայման գնահատական ստանալու են: Երկրի գործող նախագահը պաշտպանության ներքո առավ ոստիկանության բոլոր բռնությունները: Ասաց` մոռացեք դա, չգիտեմ` դա հիպնոզի ձև է, թե ինչ, բայց երկար փորձ ունենք հոգեբանական վերականգնողական աշխատանքների»:
Լարիսա Ալավերդյանը մտահոգված է, որ այս ամենը նոր բռնկման հիմք է դառնում: Նա կոչ արեց, որ ՀՀ նախագահն ու նրա շրջապատի անձինք օրենքն ու իրավունքն ամբողջական կիրառեն:
Տաթև ՀԱՐՈՒԹՅՈՒՆՅԱՆ
