«Մոդուս վիվենդի» կենտրոնի նախագահ Արա Պապյանն այսօր «Բլից ինֆո» մամուլի ակումբում որոշ բացահայտումներ արեց ՊՊԾ գունդը գրաված «Սասնա ծռերի» եւ իշխանությունների միջեւ բանակցային գործընթացից:
Արա Պապյանն ասաց, որ գեներալ Վիտալի Բալասանյանը միջնորդի միակ թեկնածուն չի եղել: «Ես անձամբ եմ զանգել Վիգեն Սարգսյանին եւ մի անձի անունով, որը համաձայն էր գործել, որին երկու կողմերն էլ կարող էին վստահել եւ առաջարկել եմ, որ այդ մարդը պատրաստ է եւ կարող է միջնորդ լինել: Ասվել է`սպասեք`տեսնենք, այլ տարբերակներ էլ կան: Հետո պարզվեց, որ այլ տարբերակը Վիտալի Բալասանյանն էր: Ի դեպ, Վարուժանի հետ էլ էինք խոսել, իրենք համաձայն էին այդ տարբերակին: Դա իշխանության ընտրությունն է եղել`ընտրել Բալասանյանին»,- ասաց բանախոսը:
Արա Պապյանը չի վիճարկում Վիտալի Բալասանյանի հեղինակությունը, ռազմական փորձն ու կարողությունները, բայց ասում է, իր առաջարկած անձը գործընթացն ավելի դիվանագիտական հունով կտաներ եւ այն բացասական անդրադարձը, որը հիմա ձեւավորվել է Վիտալի Բալասանյանի անվան շուրջ, չէր լինի:
Բացի այդ, Արա Պապյանը նկատում է, որ Վիտալի Բալասանյանի միջնորդության պարագայում նաեւ իրավական խնդիր կա, քանի որ ՀՀ իշխանություններն ասում են`ԼՂՀ-ն Հայաստանի մաս չի: Հետեւաբար, անհասկանալի է, թե ինչպես է ԼՂՀ խորհրդարանի անդամն այդ գործընթացում ներգրավվում եւ ընդունում ՀՀ քաղաքացիների հանձնվելը:
Կարդացեք նաև
Միջնորդի իր թեկնածուի անունը Արա Պապյանը չցանկացավ հրապարակել: Դրա համար, ասաց, նախ այդ մարդու համաձայնությունը պետք է ունենա:
Նելլի ԳՐԻԳՈՐՅԱՆ
