«Քաղաքացիական գիտակցություն» ազատական ՀԿ Խորհրդի հայտարարությունը հուլիսի 29-ին տեղի ունեցած միջադեպերի վերաբերյալ
Հուլիսի 29-ին Սարի Թաղ համայնքում ոստիկանության կողմից կիրառած անհամաչափ ուժի արդյունքում տարբեր աստիճանի մարմնական վնասվածքներ են ստացել բազմաթիվ քաղաքացիներ և իրենց մասնագիտական պարտականությունները կատարող լրագրողներ:
Տեղի ունեցածը խիստ մտահոգիչ է պետության կողմից ստանձնած մարդու իրավունքների պաշտպանության տեսանկյունից: Անկախ տեղի ունեցածի հանգամանքներից՝ Ոստիկանության կողմից կիրառված ուժը մենք համարում ենք ոչ համաչափ, իսկ քաղաքական տեսանկյունից՝ կոպիտ սխալ, որը հղի է երկրի ներքաղաքական իրավիճակի կտրուկ ապակայունացմամբ:
Ստեղծված իրավիճակի պատասխանատվությունն ընկնում է երկրի բարձրագույն իշխանության վրա, այն լուծելու հրամայականը ևս երկրի բարձրագույն իշխանության իրավասության տակ է: Ուստի, պահանջում ենք իրավասու մարմիններից հնարավորինս սեղմ ժամկետներում հետաքննել և պատասխանատվության ենթարկել հուլիսի 29-ին Սարի Թաղում տեղի ունեցած բռնությունները կատարողներին և այդ ապօրինի հրամանը տվողներին:
Կարդացեք նաև
Ինչպես նաև հարկ ենք համարում հայտարարել, որ ստեղծված ծայրաստիճան լարված իրավիճակի հանգուցալուծումը հնարավոր է և պարտադիր պետք է լինի միայն ու միայն խաղաղ ճանապարհով: Խաղաղ ճանապարհով խնդրի հանգուցալուծմանը նախ և առաջ պետք է նպաստեն փողոցային գործընթացները համակարգող խմբի անդամները՝ թույլ չտալով, որպեսզի հանրահավաքների և հրապարակային միջոցառումների ընթացքում տարբեր կենտրոններից սադրիչ գործողություններ կատարելու համար ուղարկված հակահասարակական տարրերը տարատեսակ բախումներ հրահրեն միջոցառումների մասնակիցների և իրավապահների միջև:
Միևնույն ժամանակ մեր զորակցությունն ենք հայտնում երեկ տարբեր մարմնական վնասվածքներ ստացած քաղաքացիներին, ոստիկաններին և իրենց մասնագիտական պարտականությունները կատարող ողջ լրագրողական համայնքին:
«Քաղաքացիական գիտակցություն» ազատական ՀԿ Խորհուրդ
