«Սփյուռքի համար ՀՀ-ի մեջ եղբայրասպանական երեւույթներ պարունակող իրողությունները մտահոգիչ են»,-«Հոդված 3» մամուլի ակումբում այսօր ասաց կանադահայ դերասանուհի, պրոդյուսեր Արսինե Խանջյանը` Ատոմ Էգոյանի կինը, որին օրերս մի խումբ ցուցարարների հետ բերման էին ենթարկել:
Արսինե Խանջյանը պատմեց, որ հուլիսի 27-ին նախքան բերման ենթարկվելը ոստիկանը նրան հարցրել է` լրագրո՞ղ եք: Խանջյանը պատասխանել է, որ ոչ, եկել է ցույցին մասնակցելու: «Հա, ուրեմն ցույցի՞ եք եկել»,-նկատել է ոստիկանը, ապա Խանջյանին բերման են ենթարկել ոստիկանական զորամաս:
«Մեր տվյալները վերցրեցին, ներս մտցրեցին, որտեղ մոտ երեսուն հոգի մարդ կար: Մարզասրահ էր: Դիմակավորված եւ զինված ոստիկաններ կային: 17-70 տարեկան բերման ենթարկվածներ կային»,-պատմեց Խանջյանը: Նա այդտեղ մնացել է մոտ երեք ժամ, ինչից հետո նրան բաց են թողել: Մամուլում տեղեկություններ էին տարածվել այն մասին, որ նրան թյուրիմացաբար են բերման ենթարկել, սակայն Խանջյանը նկատեց` ինքը սփյուռքահայ է, այլ երկրի քաղաքացի, բայց ճիշտ կլիներ` մյուս քաղաքացիներին էլ բաց թողնեին:
Զորամասում, երբ քննիչը ճշտել է Արսինե Խանջյանի տվյալները, զարմացել է եւ ասել, թե նա ի՞նչ գործ ունի ոստիկանությունում: «Դուք ըսեք` ես հոս ի՞նչ կընեմ»,-հակադարձել է Խանջյանը:
Կարդացեք նաև
Նա անդրադարձավ նաեւ «Հիմնադիր խորհրդարանի» ձերբակալված անդամ Ալեք Ենիգոմշյանին` ասելով, որ նրա առաջարկով է ելույթ ունեցել ցուցարարների առաջ. «Մենք նույն դպրոցը եւ եկեղեցին ենք հաճախել Լիբանանում»:
Լուիզա ՍՈՒՔԻԱՍՅԱՆ
