«Նոյան տապան» լրատվական կենտրոնում այսօր հրավիրված մամուլի ասուլիսի ընթացքում ՀՀ արտակարգ եւ լիազոր դեսպան, «Մտավորականների խորհուրդ» հ/կ անդամ Արման Նավասարդյանն անդրադարձավ հարցին, թե ինչու հ/կ-ն կողմ չէ ՊՊԾ գնդի շուրջ ստեղծված իրավիճակում նախագահի հրաժարականը պահանջելուն:
«Պետության ղեկավարին փոխելը հղի է լուրջ հետեւանքներով»,-նկատեց Նավասարդյանը, ապա հարցադրում արեց, թե ով եւ ինչ մեխանիզմով պետք է փոխարինի նրան:
Նավասարդյանն ընդգծեց, որ խորհուրդն առաջնահերթ դնում է Կառավարության հրաժարականի հարցը. «Ամենամեծ սխալը եղել է նա, որ ՀՀ-ում տիրապետում է ոչ պրոֆեսիոնալ մոտեցումը խնդիրների հանդեպ: Իսկ Կառավարությունը փոխել` նշանակում է բերել ազնիվ եւ պրոֆեսիոնալ մարդկանց: ՀՀ-ում «հովանավորչության մթնոլորտ» է ստեղծվել, որը խանգարում է լուծել տնտեսական եւ քաղաքական, այդ թվում` արտաքին քաղաքական խնդիրները: Եթե կան մարդիկ, որոնք պատրաստ չեն դա անելու, պետք է հեռանան: Ինչ է, չունե՞նք այդպիսի մարդիկ»:
Լուիզա ՍՈՒՔԻԱՍՅԱՆ
