«Երկրի կառավարում չենք տեսնում, չենք տեսնում Ազգային ժողով: Բազմահազարանոց ժողովուրդը փոփոխություններ է պահանջում, իսկ ԱԺ-ն ժամանակ չի գտնում կամ գլխի չի ընկել, որ արտահերթ նիստ պետք է հրավիրի»,-«Ժառանգություն» կուսակցության գրասենյակում հրավիրված մամուլի ասուլիսի ընթացքում այսօր ասաց երաժիշտ Եղիշե Պետրոսյանը, որը երեկ բերման ենթարկվածների թվում էր:
Պետրոսյանի բնորոշմամբ` երկիրն արտակարգ իրավիճակում է, մինչդեռ գործում են միայն ոստիկանությունը եւ ԱԱԾ-ն: Պետրոսյանն ընդգծեց, որ «Հիմնադիր Խորհրդարանի» անդամ Ալեք Ենիգոմշյանի ձերբակալությունը վտանգավոր է. «Նա միակ հավաստի աղբյուրն է` ապստամբներից տեղեկություններ ստանալու համար»:
Քաղաքացիական շարժումը համակարգող խորհրդի եւ «Նոր Հայաստան» հանրային փրկության ճակատի անդամ Անդրիաս Ղուկասյանն էլ իր հերթին նկատեց. «Ենիգոմշյանը հանդիսանում էր կամուրջ` ապստամբների եւ հանրության միջեւ, ապստամբները վստահում էին նրան: Նրա բացակայությունը նոր իրավիճակ է ստեղծում: Իմ համոզմամբ` դա անբարենպաստ վիճակ է բոլորի համար: Այդ պատճառով պնդում ենք, որ նա ժամ առաջ պետք է ազատ արձակվի, նաեւ մյուսները»:
Լուիզա ՍՈՒՔԻԱՍՅԱՆ
